TRT World ფორუმი მე-10 წლისთავზე, თემით „დეცენტრალიზებული მსოფლიო: ვინ ლიდერობს, როცა წესები ძალას კარგავს?“, 6 და 7 ნოემბერს სტამბოლში გაიმართება.
TRT-ის მიერ გავრცელებული განცხადების თანახმად, TRT World ფორუმი, რომელიც 2017 წლიდან მსოფლიოს წამყვან ფიგურებს აერთიანებს, მე-10 წელსაც აგრძელებს გლობალურ დიალოგში წვლილის შეტანას.
ფორუმზე, რომელშიც პრეზიდენტ რეჯეფ თაიფ ერდოღანის მონაწილეობაა მოსალოდნელი და რომელიც 6 და 7 ნოემბერს სტამბოლის კონგრეს-ცენტრში ჩატარდება, მეცნიერები, ჟურნალისტები, სპორტსმენები, ხელოვანები, პოლიტიკოსები და არასამთავრობო ორგანიზაციების წარმომადგენლები შეიკრიბებიან მსოფლიოს აქტუალური საკითხების განსახილველად.
TRT World ფორუმი, რომელიც წლებია საერთაშორისო დღის წესრიგთან დაკავშირებით განსხვავებულ ხედვებს უყრის თავს, მე-10 წელსაც თანამედროვე მსოფლიოს ძალთა ცვალებად ბალანსსა და ლიდერობის გაგებას განიხილავს.
ბოლო 10 წლის განმავლობაში გამართულ 86 ღია და 76 დახურულ სესიაში TRT World ფორუმმა 801 სპიკერი ათასობით მონაწილესთან შეახვედრა და განსხვავებული შეხედულებებისა და გამოცდილების გაზიარებას შეუწყო ხელი. TRT World ფორუმის, რომელიც როგორც გლობალურ, ისე რეგიონულ პრიორიტეტებსა და დღის წესრიგს განსაზღვრავს, წლევანდელ მთავარ თემებს შორისაა ხელოვნური ინტელექტი, ენერგეტიკული კრიზისები, საერთაშორისო სამართალი და ეკონომიკა.
ფორუმზე წელს ღია სესიების ფარგლებში შემდეგი თემები განიხილება: „თურქეთი: რეგიონული ძალიდან რეგიონთაშორის აქტორამდე — მაღალი რისკის დიპლომატიის დაბრუნება: საშუალო ძალები და აღმავალი მრავალპოლუსიანი წესრიგი“, „ამერიკული პარადოქსი საერთაშორისო სისტემაში“, „მტკივნეული აღდგენის პროცესისკენ: ახლო აღმოსავლეთში ომების შემდგომი ეროვნული ეკონომიკები“, „ღაზა საერთაშორისო სამართლისა და ჰუმანიტარული კოლაფსის გზაგასაყარზე“, „დაკავშირებადობის ახალი გეოპოლიტიკა: საზღვაო გზები, სრუტეები და დერეფნები“, „ვის ხელშია კონტროლი ალგორითმულ ეპოქაში? კომპანიები, სახელმწიფოები, მოქალაქეები“, „ენერგეტიკული კრიზისების შემდგომი ბიძგები: ინსტიტუტები წნეხის ქვეშ“ და „პასუხისმგებლობის მართვა ხელოვნური ინტელექტის ეპოქაში“.
ამავდროულად, ფორუმზე დარგის ექსპერტების მიერ მრგვალი მაგიდის შეხვედრებზე განიხილება სხვადასხვა საკითხი — აზია-წყნარი ოკეანის უსაფრთხოების დინამიკიდან დაწყებული ევრაზიულ სტრუქტურირებამდე, რუსეთ-უკრაინის ომიდან აფრიკაში დიპლომატიასა და გეოეკონომიკამდე.
TRT World ფორუმზე რეგისტრაცია „https://www.trtworldforum.com/register/“-ის მეშვეობით განხორციელდება.
