პრეზიდენტმა რეჯეფ თაიფ ერდოღანმა განაცხადა: „უმკაცრესად ვგმობთ ჰუსიტების მიერ 10 ოქტომბერს ერ-რიადში, მეფე ხალიდის საერთაშორისო აეროპორტის წინააღმდეგ განხორციელებულ თავდასხმებს, რასაც 12 ადამიანის სიცოცხლე ემსხვერპლა და 309 დაშავდა“.

ერდოღანმა საპრეზიდენტო კომპლექსში, მინისტრთა კაბინეტის სხდომის შემდეგ, ერს მიმართა.

ერდოღანმა ყურადღება გაამახვილა იმაზე, რომ თურქეთის რეგიონში კონფლიქტის ზონებს ყოველდღიურად ახალი ემატება, და აღნიშნა:

„დაძაბულობა იზრდება ლიბანიდან იემენამდე და ირანამდე გადაჭიმულ ხაზზე, განსაკუთრებით კი პროქსი ძალების მეშვეობით ცდილობენ სხვადასხვა ანგარიშსწორებას. თურქეთი უკვე გარკვეული დროა, მის გარშემო არსებული კრიზისული სარტყლის მიუხედავად, დღითიდღე განამტკიცებს სტაბილურობის კუნძულის, უსაფრთხოებისა და მშვიდობის კუნძულის პოზიციას. რეგიონული პასუხისმგებლობის გაცნობიერებით, ჩვენ მხარს ვუჭერთ უთანხმოებების მოგვარებას არა ბრძოლის ველზე, არამედ მოლაპარაკებების მაგიდასთან, დიალოგისა და დიპლომატიის გზით. სუვერენიტეტისა და ტერიტორიული მთლიანობის ურთიერთპატივისცემა ჩვენი ძირითადი პრინციპია. ჩვენი აზრით, დაყოფა და დანაწევრება მხოლოდ იმ ბოროტი ძალების ინტერესებს მოემსახურება, რომლებსაც ჩვენი რეგიონის სისხლის გუბედ გადაქცევა სურთ.

ამ კონტექსტში, ჩვენ უმკაცრესად ვგმობთ ჰუსიტების მიერ 10 ოქტომბერს ერ-რიადში, მეფე ხალიდის საერთაშორისო აეროპორტის წინააღმდეგ განხორციელებულ თავდასხმებს, რასაც 12 ადამიანის სიცოცხლე ემსხვერპლა და 309 დაშავდა. დაღუპულ ძმებს, რომელთა შორისაც უმრას მომლოცველებიც იყვნენ, ყოვლისშემძლე ალაჰის წყალობას, ხოლო დაშავებულ ძმებს სწრაფ გამოჯანმრთელებას ვუსურვებთ. თურქეთი ამ უკანონო და არაადამიანური თავდასხმების პირისპირ საუდის არაბეთისა და საუდელი ძმების გვერდით დგას“.

პრეზიდენტმა ერდოღანმა ასევე აღნიშნა, რომ თურქეთს, პაკისტანსა და საუდის არაბეთს შორის 7 აგვისტოს ხელმოწერილი ერთობლივი თავდაცვის შეთანხმების ინსტიტუციური ინფრასტრუქტურის შექმნაზე მუშაობა გრძელდება.