თურქეთში სოციალური ქსელების მომხმარებელთა ასაკის დადასტურებასთან დაკავშირებით ახალი რეგულაცია შაბათს ოფიციალურ მაცნეში (Resmi Gazete) გამოქვეყნდა. რეგულაციით სოციალურ პლატფორმებს 15 წლამდე ასაკის ბავშვებისთვის მომსახურების გაწევა აეკრძალათ.
კიბერუსაფრთხოების დეპარტამენტის მიერ მომზადებული რეგულაციის თანახმად, ასაკის დადასტურების პროცედურა e-Devlet-ის (ელექტრონული მთავრობის) პორტალის მეშვეობით განხორციელდება.
სოციალური ქსელების პროვაიდერები ვერ მოემსახურებიან 15 წლამდე ასაკის ბავშვებს. ხოლო 15 წელს მიღწეული მომხმარებლების ანგარიშებისთვის შეთავაზებული იქნება ბავშვებზე მორგებული სპეციალური სერვისები, რომლებიც გაითვალისწინებს ბავშვის საუკეთესო ინტერესებს და მის ფიზიკურ, გონებრივ, ფსიქოლოგიურ, სოციალურ და ემოციურ განვითარებას.
რეგულაციის ფარგლებში, პლატფორმები ვალდებულნი იქნებიან ბავშვთა ანგარიშებზე ნაგულისხმევ რეჟიმში მკაცრი კონფიდენციალურობის პარამეტრები გამოიყენონ და პროფილები დახურული გახადონ. ამ ანგარიშებზე პირდაპირი ეთერის ჩართვა და პერსონალიზებული რეკლამები დაუშვებელი იქნება.
პლატფორმებმა ასევე უნდა უზრუნველყონ, რომ ბავშვებმა შეტყობინებები მიიღონ მხოლოდ იმ ანგარიშებიდან, რომლებსაც თავად ადევნებენ თვალს, ხოლო გამომწერთა და გამოწერილთა სიები სხვა მომხმარებლებისთვის დამალული იქნება.
სოციალური მედიის კომპანიები ასევე ვალდებულნი იქნებიან დანერგონ მშობელთა კონტროლის ინსტრუმენტები, რომლებიც მშობლებს საშუალებას მისცემს მართონ შვილების ანგარიშის პარამეტრები, შეზღუდონ გამოყენების დრო და დაადასტურონ ფასიანი ტრანზაქციები.
რეგულაცია ძალაში 1 ნოემბრიდან შევა. არსებული ანგარიშებისთვის ასაკის დადასტურების პროცესი 2027 წლის 31 მარტამდე უნდა დასრულდეს. შემოწმების შედეგად გამოვლენილი 15 წლამდე ასაკის მომხმარებელთა ანგარიშები დაიხურება.
