აშშ-ის პრეზიდენტმა დონალდ ტრამპმა განაცხადა, რომ ირანთან ომი ძალიან მალე დასრულდება და ნავთობის ფასები სწრაფად დაეცემა. მისი თქმით, აშშ-ს სურს დარწმუნდეს, რომ ირანს „მომავალშიც არ ექნება ბირთვული იარაღი“.

თეთრი სახლის ოვალურ კაბინეტში გამართულ პრესკონფერენციაზე აშშ-ის პრეზიდენტმა დონალდ ტრამპმა ირანთან დაკავშირებულ საკითხებზე ისაუბრა.

ჟურნალისტმა მას ჰკითხა, რომ 3 ნოემბერს აშშ-ში დაგეგმილი კონგრესის შუალედური არჩევნების წინ ამომრჩევლები საწვავის მაღალ ფასებს უჩივიან. პასუხად ტრამპმა განაცხადა: „სხვა არჩევანი არ მქონდა. როგორც კი ირანთან ომი დასრულდება, რაც ძალიან მალე მოხდება, ნავთობის ფასები ქვასავით დაეცემა“.

აშშ-ის პრეზიდენტის მტკიცებით, ნავთობის მაღალი ფასები „მცირე საფასურია“, რომლის გადახდაც ღირს იმისთვის, რომ ირანს ბირთვული იარაღი არ ჰქონდეს. მან აღნიშნა, რომ ფასები მალე შემცირდება და ყველა კმაყოფილი იქნება.

დონალდ ტრამპის თქმით, ირანს ჯერ კიდევ აქვს გარკვეული საკითხები მოსაგვარებელი და სწორედ ამიტომ ომი სრულად არ დასრულებულა.

„თუ მოვინდომებთ, ახლავე შეგვიძლია იქიდან გამოვიდეთ და ეს შესანიშნავად შესრულებული სამუშაო იქნებოდა, თუმცა ეს ჩემთვის საკმარისი არ არის. უნდა დავრწმუნდეთ, რომ ეს (ბირთვული იარაღის შექმნა) არც ხუთი, არც ექვსი და არც ათი წლის შემდეგ არ მოხდება. ასეც იქნება“, - განაცხადა ტრამპმა.