ირანმა უარყო იემენელი ჰუსიტების თავდასხმებთან რაიმე კავშირი - ერთი დღის შემდეგ მას მერე, რაც საუდის არაბეთმა განაცხადა, რომ თეირანი ქვეყნის წინააღმდეგ ჰუსიტების ბოლო იერიშების გახშირებაში გარკვეულ როლს თამაშობს.
ირანის საგარეო საქმეთა სამინისტროს პრესსპიკერმა ესმაილ ბაღეიმ პარასკევს გაკეთებულ განცხადებაში აღნიშნა: „ირანის ისლამური რესპუბლიკა უარყოფს ყველა მტკიცებას იმის შესახებ, რომ რაიმე როლი აქვს იემენში მიმდინარე (ჰუსიტების) ოპერაციებში“.
ბაღეის თქმით, ჰუსიტი მებრძოლები საკუთარი ინტერესებისა და შეფასებების მიხედვით მოქმედებენ, ხოლო ბრალდებები ირანის თავდასხმებში მონაწილეობის შესახებ არადამაჯერებელია. მან ასევე დასძინა, რომ თეირანის ხელმძღვანელობა დაძაბულობის ესკალაციას არცერთი მხარის ინტერესებში არ მიიჩნევს.
მას შემდეგ, რაც ივლისში იემენის სამოქალაქო ომი კვლავ გამწვავდა, ირანის მოკავშირე ჰუსიტებმა არაერთხელ მიიტანეს იერიში საუდის არაბეთის ობიექტებზე, მათ შორის წითელ ზღვაში ნავთობტანკერებზე, ნავთობტერმინალებზე და ერ-რიადის საერთაშორისო აეროპორტზე. გასულ კვირას აეროპორტზე განხორციელებული ერთი თავდასხმის შედეგად 13 ადამიანი დაიღუპა. ერ-რიადის ხელისუფლების ცნობით, აეროპორტებზე თავდასხმების შედეგად ჯამში 19 ადამიანი დაიღუპა და 360-ზე მეტი დაშავდა.
საუდის არაბეთის მეთაურობით მოქმედი სამხედრო კოალიცია ათ წელზე მეტია მხარს უჭერს იემენის საერთაშორისოდ აღიარებულ მთავრობას. კოალიციამ განაცხადა, რომ პარასკევს, საუდის არაბეთის მიმართულებით ჰუსიტების თავდასხმების გაგრძელების ფონზე, მორიგი რაკეტები და უპილოტო საფრენი აპარატები გაანადგურა.
ერთი დღით ადრე საუდის არაბეთის საგარეო საქმეთა სამინისტროს წარმომადგენელმა განაცხადა, რომ ირანი თავდასხმების ესკალაციას „ახალისებდა“, თეირანმა კი ეს ბრალდება უარყო.
საუდის არაბეთის საგარეო საქმეთა მინისტრის მოადგილემ საჯარო დიპლომატიის საკითხებში, რაიდ ქრიმლიმ აღნიშნა, რომ ბოლო შეტაკებების დასაწყისში ჰუსიტებმა ომანში მოლაპარაკებების გამართვის შეთავაზება უარყვეს.
ბაღეიმ კი გაიმეორა ირანის შეთავაზება ორ მხარეს შორის შუამავლობის შესახებ და აღნიშნა, რომ თეირანი „ყოველთვის მზადაა კეთილი ნების ინიციატივებისთვის, რათა კონფლიქტის დასრულებას შეუწყოს ხელი“.
ბალისტიკური რაკეტის განადგურება
საუდის არაბეთის მეთაურობით მოქმედი სამხედრო კოალიციის პრესსპიკერმა პარასკევს გაკეთებულ განცხადებაში აღნიშნა: „სამხრეთის რეგიონსა და ერ-რიადში სამი დრონი, ხოლო წითელ ზღვაზე ორი ფრთოსანი რაკეტა ჩამოვაგდეთ და გავანადგურეთ“.
პრესსპიკერმა დასძინა: „ბოლო საათებში ქალაქ იანბუს თავზე ბალისტიკური რაკეტაც ჩამოვაგდეთ და გავანადგურეთ“. წითელი ზღვის სანაპიროზე მდებარე იანბუში განთავსებულია მნიშვნელოვანი ნავთობსადენის საზღვაო ტერმინალი.
თავდასხმები გახშირდა მას შემდეგ, რაც სექტემბერში იემენში ჰუსიტების მოულოდნელი შეტევის შედეგად მათ სამთავრობო ძალებისგან წითელი ზღვის სანაპიროზე მდებარე ის სტრატეგიული რეგიონები ჩაიგდეს ხელში, რომლებიც გლობალური საზღვაო გადაზიდვების ერთ-ერთ უმნიშვნელოვანეს საკვანძო მარშრუტს აკონტროლებს.
მსოფლიოში ნავთობის უმსხვილეს ექსპორტიორ საუდის არაბეთზე ზეწოლა გაძლიერდა იმ პერიოდში, როდესაც გლობალური ენერგეტიკული ბაზრები ისედაც შერყეული იყო. ირანმა თებერვალში, მის წინააღმდეგ დაწყებული უფრო ფართომასშტაბიანი აშშ-ისრაელის ომის დროს, ჰორმუზის სრუტე გადაკეტა.
საუდის არაბეთის საგარეო საქმეთა მინისტრის მოადგილე ქრიმლიმ ხუთშაბათს ირანი დაადანაშაულა „გაეროს უშიშროების საბჭოს რეზოლუციების დარღვევით ჰუსიტი მებრძოლების კვლავ შეიარაღებაში, მომზადებასა და მხარდაჭერაში“.
იემენის სამთავრობო ძალებმა, საუდის არაბეთის საჰაერო მხარდაჭერით, კონტრშეტევა წამოიწყეს ჰუსიტების მიერ დაკავებული ტერიტორიების დასაბრუნებლად. თუმცა, სამთავრობო ძალებმა ამ დრომდე ვერ შეძლეს ჰუსიტების მიერ მიღწეული წარმატებების უკუქცევა.
იემენის მთავრობის დროებით დედაქალაქ ადენში ადგილობრივმა უსაფრთხოების სამსახურმა განაცხადა, რომ პარასკევს ქალაქის აეროპორტის ტერიტორიაზე ორი რაკეტა ჩამოვარდა. განცხადებაში აღნიშნულია, რომ ეს იყო „ერთ კვირაზე ნაკლებ დროში მომხდარი მეორე მსგავსი ინციდენტი“, თუმცა თავდასხმას მსხვერპლი არ მოჰყოლია.
ერთი დღით ადრე კი ჰუსიტებმა ადენში მდებარე საპრეზიდენტო სასახლეზე სისხლიანი სარაკეტო დარტყმა განახორციელეს. ჯანდაცვის მინისტრის განცხადებით, თავდასხმის შედეგად 5 ადამიანი დაიღუპა და 16 დაშავდა.
იემენის პრემიერ-მინისტრმა შაია ეზ-ზინდანიმ პლატფორმა X-ზე თავდასხმას „ლაჩრული“ უწოდა და განაცხადა, რომ ეს „ჰუსიტების დანაშაულებრივი ქმედებების გაგრძელებაა“.
ანონიმურობის დაცვის პირობით ერთ-ერთმა მინისტრმა განაცხადა, რომ ჰუსიტებმა დარტყმა მიაყენეს სასახლის კომპლექსში განთავსებულ სამეთაურო ცენტრებს, რომლებიც იემენისა და საუდის არაბეთის მეთაურობით მოქმედ კოალიციურ ძალებს ეკუთვნოდა.
ჰუსიტებთან დაკავშირებული მედიასაშუალებების ცნობით კი თავდასხმის სამიზნე იყო ადენში, ალ-მაშიკის სასახლეში მდებარე სამხედრო ოპერაციების შტაბ-ბინა, რომელსაც საუდელი ოფიცრები ხელმძღვანელობდნენ.
