აშშ-ში, ფლორიდის შტატის ქალაქ ტალაჰასიში, ფლორიდის A&M უნივერსიტეტის Bragg Memorial-ის სტადიონთან შაბათს ღამით მომხდარი შეიარაღებული თავდასხმის შედეგად სულ მცირე 12 ადამიანი დაშავდა.

ადგილობრივმა პოლიციამ და უნივერსიტეტის ადმინისტრაციამ განაცხადეს, რომ დაშავებულთაგან 11 ცეცხლსასროლი იარაღით არის დაჭრილი; დაშავებულებიდან ექვსი ზრდასრულია, ხოლო ექვსი — ბავშვი.

ტალაჰასის პოლიციის დეპარტამენტის ცნობით, თავდასხმის შედეგად დაშავებულთაგან სულ მცირე სამის მდგომარეობა მძიმეა, ხოლო დანარჩენი ცხრის — სტაბილური.

ოფიციალური პირებისა და ადგილობრივი მედიის ინფორმაციით, თავდასხმა უნივერსიტეტის კურსდამთავრებულთა ტრადიციული შეკრების ფარგლებში გამართული ამერიკული ფეხბურთის მატჩის დასრულებისთანავე მოხდა. ინციდენტის გამო ტერიტორიაზე მყოფ მოქალაქეებს თავშესაფრებში დარჩენისკენ მოუწოდეს.

პოლიციის წარმომადგენელმა ალისია ჰილმა დაადასტურა ინფორმაცია დაშავებულების შესახებ, ხოლო ადგილობრივი გაზეთის, Tallahassee Democrat-ის ცნობით, სამართალდამცავებმა განაცხადეს, რომ შემთხვევის ადგილზე უსაფრთხოება სრულად არის უზრუნველყოფილი.

ფლორიდის A&M უნივერსიტეტმა ადგილობრივი დროით დაახლოებით 20:40 საათზე უსაფრთხოების განგაში გამოაცხადა და სტადიონის მახლობლად მყოფ პირებს ადგილზე დარჩენის ან ტერიტორიისგან თავის არიდებისკენ მოუწოდა.

ფლორიდის სახელმწიფო უნივერსიტეტმაც ტალაჰასიში მყოფ თავის სტუდენტებს, პროფესორ-მასწავლებლებსა და თანამშრომლებს უსაფრთხოების მიზნით დახურულ სივრცეებში დარჩენა ურჩია. უნივერსიტეტმა აღნიშნა, რომ არ არსებობს რაიმე მტკიცებულება მათი წევრების აღნიშნულ ინციდენტთან კავშირის შესახებ.

შეიარაღებული თავდასხმის გარემოებების დასადგენად გამოძიება გრძელდება.