უკრაინის საგანგებო სიტუაციების სახელმწიფო სამსახურმა განაცხადა, რომ კიევისა და ხარკოვის ოლქებზე რუსეთის მიერ მიტანილი იერიშების შედეგად 3 ადამიანი დაიღუპა, 11 კი დაშავდა.
სამსახურის მიერ სამშაბათს გავრცელებულ განცხადებაში აღნიშნულია, რომ კიევის ოლქის ობუხოვის რაიონში რუსულმა ძალებმა საწარმოო და სასაწყობო ობიექტი დაბომბეს, რის შედეგადაც 3 ადამიანი დაიღუპა და 6 დაშავდა.
მათივე ცნობით, თავდასხმის შედეგად გაჩენილი ხანძარი ლიკვიდირებულია, ხოლო სამძებრო-სამაშველო ჯგუფები ნანგრევების გაწმენდის სამუშაოებს აგრძელებენ.
სამსახურის ინფორმაციით, ჩრდილო-აღმოსავლეთით მდებარე ხარკოვის ოლქის ქალაქ იზიუმზე უპილოტო საფრენი აპარატებით მიტანილი იერიშის შედეგად 5 ადამიანი დაშავდა.
რუსული იერიშები ლოგისტიკურ ინფრასტრუქტურაზე
თავის მხრივ, რუსეთის თავდაცვის სამინისტრომ განაცხადა, რომ მათმა ძალებმა უკრაინის ლოგისტიკურ და საპორტო ინფრასტრუქტურასთან ერთად, იმ სატვირთო გემებზეც მიიტანეს დარტყმა, რომლებსაც, მათი მტკიცებით, უკრაინის შეიარაღებული ძალებისთვის სამხედრო და ორმაგი დანიშნულების ტვირთი გადაჰქონდათ.
სამინისტროს ცნობით, სამიზნე ობიექტებს შორის იყო ლოგისტიკური ცენტრი ხმელნიცკში, სატრანსპორტო-ლოგისტიკური ცენტრი ვოლინის ოლქის ქალაქ კოველში და ოდესის ოლქის რენის პორტში მდგომი 3 სატვირთო გემი, რომლებიც ტვირთისგან იცლებოდა.
უწყებაში ასევე აღნიშნეს, რომ რუსულმა ძალებმა დაარტყეს სატვირთო გემს, რომელსაც უკრაინისთვის სამხედრო ტვირთი გადაჰქონდა და ოდესის პორტისკენ მიემართებოდა.
რუსეთის თავდაცვის სამინისტრომ ასევე განაცხადა, რომ ღამის საათებში, ქვეყნის 15 სხვადასხვა რეგიონში, რუსულმა საჰაერო თავდაცვის სისტემებმა უკრაინული 136 უპილოტო საფრენი აპარატი დააფიქსირეს და გაანადგურეს.
