მსოფლიო ეთნოსპორტის კონფედერაციის მიერ ორგანიზებულმა მე-8 ეთნოსპორტის კულტურულმა ფესტივალმა სტამბოლის ათათურქის აეროპორტში ეთნოსპორტის მოყვარულების მიღება დაიწყო.
ფესტივალი, რომლის საკომუნიკაციო პარტნიორიც თურქეთის ტელე-რადიო მაუწყებლობა TRT-ა და რომელიც წელს 21-24 მაისს ტარდება, სტამბოლის ათათურქის აეროპორტში მოწყობილი „ხანის კარვის“ წინ მოსწავლეების მიერ „გულბანქის“ ტრადიციით შესრულებული წარმოდგენით გაიხსნა. რის შემდეგაც სცენაზე სტამბოლის ისტორიული თურქული მუსიკის ანსამბლის „მეჰთერანის“ გუნდი გამოვიდა.
გახსნაზე სიტყვით გამოსვლისას მსოფლიო ეთნოსპორტის კონფედერაციის პრეზიდენტმა, ბილალ ერდოღანმა განაცხადა, რომ ფესტივალის განმავლობაში კულტურული სიმდიდრე ყველასთვის ერთობლივად ხელმისაწვდომი იქნება.
ბილალ ერდოღანმა მიესალმა სტუმრებს და აღნიშნა, რომ ფესტივალის ფარგლებში გაიმართება სხვადასხვა ღონისძიება, პირველ რიგში ჭიდაობა და ჯირითობის სპორტის სახეობები.
მან ასევე ხაზი გაუსვა, რომ ფესტივალის ფარგლებში დაგეგმილ აქტივობებში ბავშვები და ოჯახები ტრადიციულ კულტურას ეზიარებიან: „წელსაც აქ, 4 დღის განმავლობაში, ჩვენი კულტურის სიმდიდრეს ყველანი ერთად ვიგრძნობთ. ჩვენს შვილებთან და უფროსებთან ერთად, მთელი ოჯახით ვიგრძნობთ ტრადიციის სურნელსა და ატმოსფეროს და აქ ერთად ვუმასპინძლებთ მსოფლიოს სხვადასხვა კუთხიდან ჩამოსულ სტუმარ ხელოვანებს, სპორტსმენებსა და კულტურის მოღვაწეებს. ბავშვები, რომლებიც დღეს აქ მოვიდნენ, დაინახავენ და იგრძნობენ, რამდენად ძვირფასი და მნიშვნელოვანია კულტურული მრავალფეროვნება“, - განაცხადა მან.
ბილალ ერდოღანმა ყურადღება გაამახვილა სტამბოლის საერთაშორისო მნიშვნელობაზე და სიტყვით გამოსვლის შემდეგ ბავშვებთან ერთად სიმბოლური ლენტი გაჭრა, რითაც ფესტივალი ოფიციალურად გახსნა.
