ფრანგული გაზეთის, Le Parisien-ის ინფორმაციით, რომელიც გამოძიებასთან დაკავშირებულ წყაროებს ეყრდნობა, საფრანგეთის ჩრდილო-აღმოსავლეთში, ქალაქ ვინგენ-სურ-მოდერში მდებარე Lalique-ის მუზეუმი კვირა დილას გაძარცვეს. მოპარულია თითქმის 4 მილიონი ევროს ღირებულების სამკაულები.
გავრცელებული ინფორმაციით, რამდენიმე ნიღბიანმა პირმა კარი ძალის გამოყენებით გააღო, ექვსი ვიტრინა ჩაამსხვრია და 20 ერთეული ბროლის სამკაულის წაღება მოახერხა.
სტატიაში ასევე აღნიშნულია, რომ მუზეუმი უახლოეს დღეებში დაკეტილი იქნება, სანამ სპეციალისტები ზარალს შეაფასებენ და უსაფრთხოების ზომებს გაამკაცრებენ.
მუზეუმმა პლატფორმა X-ის მეშვეობით განაცხადა: „ჟანდარმერია საქმეში ჩაერთო და გამოძიება თავისი კალაპოტით გაგრძელდება“.
ვინგენ-სურ-მოდერის მერმა, კრისტიან დორშნერმა ადგილობრივ გაზეთთან (Dernieres Nouvelles d'Alsace) საუბრისას აღნიშნა, რომ ვინაიდან მძარცველებმა პირდაპირ სამკაულების კოლექციას მიაკითხეს, სავარაუდოა, რომ ისინი „კარგად ინფორმირებულები“ იყვნენ.
მერმა განმარტა, რომ მუზეუმის სიგნალიზაციის სისტემამ გამართულად იმუშავა, თუმცა დაცვის კომპანიამ პოლიციის დაუყოვნებლივ გაფრთხილება დააგვიანა.
სამართალდამცველები სათვალთვალო კამერების ჩანაწერებს სწავლობენ. საქმის გამოძიება ქვემო რეინის (Bas-Rhin) ჟანდარმერიის კრიმინალური გამოძიების განყოფილებას გადაეცა.
Le Parisien-ი იტყობინება, რომ 2025 წლის ოქტომბერში ლუვრის მუზეუმში მომხდარი გახმაურებული ძარცვის შემდეგ (როდესაც დაახლოებით 102 მილიონი დოლარის ღირებულების ექსპონატები მოიპარეს), აღნიშნული მუზეუმი „მოწყვლადი ობიექტების“ სიაში იყო შეყვანილი და „სპეციალური მეთვალყურეობის“ ქვეშ იმყოფებოდა.
