ცენტრალური ამერიკის ქვეყანა პანამაში მომხდარმა 7,7 მაგნიტუდის ძლიერმა მიწისძვრამ ქვეყნის ცენტრალურ ნაწილში შენობებისა და გზების ჩამონგრევა გამოიწვია. პირველადი მონაცემებით, მსხვერპლის შესახებ ინფორმაცია არ გავრცელებულა.
პრეზიდენტმა ხოსე რაულ მულინომ პარასკევს მომხდარი მიწისძვრა „დიდ კატასტროფად“ შეაფასა და განაცხადა, რომ ეპიცენტრის მახლობლად გზები განადგურდა. მულინოს მიწისძვრის შედეგად დაღუპულთა შესახებ ინფორმაცია არ გაუვრცელებია.
სამოქალაქო დაცვის ეროვნული სისტემის ცნობით, მცირე სიღრმეზე მომხდარი მიწისძვრა ცენტრალური ამერიკის ქვეყნის თითქმის მთელ ტერიტორიაზე იგრძნობოდა.
ბიძგები დაახლოებით ერთ წუთს გაგრძელდა.
მიწისძვრის ეპიცენტრიდან დაახლოებით 200 კილომეტრში მდებარე დედაქალაქ პანამაში, ცათამბჯენებიდან ხალხის ევაკუაციის მცდელობამ პანიკა გამოიწვია.
განმეორებითი ბიძგების შემდეგ 15-სართულიანი შენობიდან მეორედ ევაკუირებულმა 46 წლის სალომონ ანდიონმა საინფორმაციო სააგენტო AFP-ს განუცხადა: „ძალიან შემეშინდა, რადგან ბიძგები ძალიან ძლიერი იყო და დიდხანს გაგრძელდა. ისეთი მძიმე ნივთები ირყეოდა, როგორიცაა კომოდი, საწოლი და სამზარეულოს ყველა ნივთი“.
სოციალურ ქსელებში გავრცელებულ ვიდეოში ჩანს, როგორ გადმოედინება წყალი 20 სართულზე მაღალი შენობის სახურავზე მდებარე აუზიდან.
სხვა ვიდეოში კი ჩანს, თუ როგორ ირყევა ძლიერად პანამის არხზე გადებული ხიდი მასზე მოძრავი ავტომობილების პარალელურად, თუმცა მთლიანობას ინარჩუნებს.
გამოცხადდა ცუნამის საშიშროება.
აშშ-ის გეოლოგიური სამსახურის (USGS) ცნობით, მიწისძვრა გრინვიჩის დროით 17:56 საათზე, ერერას პროვინციის პატარა ქალაქ პიტალოსა არიბადან 10 კილომეტრში მოხდა.
USGS-მა მიწისძვრის მაგნიტუდა თავდაპირველად 8,0-ით განსაზღვრა, თუმცა მოგვიანებით 7,7-მდე დააზუსტა.
წყნარი ოკეანის აღმოსავლეთ ნაწილისთვის გამოცხადებული ცუნამის საშიშროება მოგვიანებით გაუქმდა.
პანამის არხის ადმინისტრაციამ განაცხადა, რომ წყნარი და ატლანტის ოკეანეების დამაკავშირებელ არხში გემების მოძრაობა მიწისძვრას არ შეუფერხებია და ოპერაციები ჩვეულ რეჟიმში გრძელდება.
პრეზიდენტი მულინო სტიქიის შედეგების სალიკვიდაციო სამუშაოების კოორდინაციისთვის ქალაქ პენონომეში გაემგზავრა.
ჯანდაცვის მინისტრმა ფერნანდო ბოიდმა განაცხადა, რომ მიწისძვრამ ყველაზე მეტად ერერასა და კოკლეს პროვინციები, ასევე სამხრეთ-აღმოსავლეთით მდებარე ლოს-სანტოსის პროვინცია დააზარალა.
ბოიდის თქმით, ლოს-სანტოსის პროვინციის დაბა ტონოსი გარე სამყაროს სრულად მოწყდა.
ბოიდმა აღნიშნა: „ვცდილობთ დავადგინოთ, როგორ მივაღწიოთ იქამდე საჰაერო გზით, რადგან ხმელეთით მისვლა შეუძლებელია“.
რეგიონის ერთ-ერთი მნიშვნელოვანი სატრანსპორტო კვანძი, პანამის საერთაშორისო აეროპორტი, დროებით დაიხურა.
სამოქალაქო ავიაციის სააგენტოს ცნობით, უსაფრთხოების მიზნით ზოგიერთი რეისი სხვა აეროპორტებში გადამისამართდა.
კოლუმბიის, ეკვადორისა და გვატემალის ლიდერებმა სოლიდარობის გზავნილები გაავრცელეს და ქვეყანას დახმარება შესთავაზეს.
დაფიქსირდა 80-ზე მეტი განმეორებითი მიწისძვრა.
პანამაში მიწისძვრები იშვიათად ხდება და ძირითადად კოსტა-რიკის საზღვართან, ქვეყნის დასავლეთ პროვინცია ჩირიკიში ფიქსირდება.
ყოფილმა პრეზიდენტმა რიკარდო მარტინელიმ Instagram-ის საკუთარ გვერდზე ვერაგუასის პროვინციის ქალაქ სონაში დანგრეული სახლის ფოტოები გამოაქვეყნა.
ადგილობრივ მედიაში გავრცელებულმა კადრებმა აჩვენა, რომ პენონომეში ეკლესია და სასტუმროც მძიმედ დაზიანდა.
ადგილობრივმა დედამიწის შემსწავლელ მეცნიერებათა ინსტიტუტმა განაცხადა, რომ 80-ზე მეტი განმეორებითი ბიძგი დაფიქსირდა, მათგან ერთ-ერთი 6,0-ზე მეტი მაგნიტუდის იყო.
განათლების სამინისტრომ ქვეყნის მასშტაბით სკოლებში სასწავლო პროცესის შეჩერების შესახებ გამოაცხადა.
ამასთან, ლათინური ამერიკისა და კარიბის ზღვის აუზის განვითარების ბანკმა პანამას 50 მილიონ დოლარამდე საკრედიტო რესურსი გამოუყო.
ბანკმა ასევე პლატფორმა X-ზე გაავრცელა განცხადება, რომ ქვეყანას 250 ათასი დოლარი უსასყიდლოდ გადასცა.
პანამის მიწისძვრა ლათინურ ამერიკაში წელს მომხდარი 7,0-ზე მეტი მაგნიტუდის სულ მცირე მეოთხე მიწისძვრა გახდა.
ივნისში ვენესუელის გუაირას რეგიონში ერთმანეთის მიყოლებით დამანგრეველი მიწისძვრები მოხდა, ხოლო აგვისტოში კოლუმბიის დასავლეთი ძლიერმა მიწისძვრამ შეძრა.
