საერთაშორისო კოსმოსური ფედერაციის (IAF) მიერ ორგანიზებული კონგრესი, მრეწველობისა და ტექნოლოგიების სამინისტროს კოორდინაციით, თურქეთის კოსმოსური სააგენტოსა (TUA) და SAHA Istanbul-ის თანამასპინძლობით, ანტალიის NEST-ის საკონგრესო ცენტრში იმართება.

ღონისძიება კოსმოსის მშვიდობიანი გამოყენების საფუძველზე, თემით „The World Needs More Space“ (მსოფლიოს მეტი კოსმოსი სჭირდება) ტარდება.

კონგრესის ოფიციალური გახსნის ცერემონია პრეზიდენტ რეჯეფ თაიფ ერდოღანის მონაწილეობით 14:30 საათზე გაიმართება.

კონგრესზე, სადაც 108 ქვეყნიდან 6 893 დელეგატი და მონაწილე დარეგისტრირდა, კოსმოსის სფეროს კრიტიკულად მნიშვნელოვანი საკითხები განიხილება.

კონგრესს საერთაშორისო ინსტიტუტების, კოსმოსური სააგენტოების ოფიციალური პირები და დარგის წარმომადგენლებიც დაესწრებიან.

ღონისძიების ფარგლებში გაიმართება მრგვალი მაგიდის ფორმატის შეხვედრები, პანელური დისკუსიები, მოხსენებების პრეზენტაციები და ვორქშოფები.

პარასკევს კარი ყველა ვიზიტორისთვის გაიღება

საერთაშორისო კოსმოსურ კონგრესზე (IAC) სივრცეში „Future Space“, რომელიც პირველად იქნება წარმოდგენილი, გამოიფინება ახალი თაობის კოსმოსური ტექნოლოგიები, სიმულაციები და ინტერაქტიული გამოცდილებები.

ადგილობრივ და უცხოელ სტუმრებს ასევე წარედგინებათ გამოფენა „ანატოლიელები“ (Anadolu'dakiler), რომელიც ანატოლიის მდიდარ კულტურულ და საწარმოო მემკვიდრეობას ასახავს.

კონგრესის ფარგლებში ხვალ გასამართი „IAF-ის გლობალური კოსმოსური ლიდერების სამიტი“ 40-ზე მეტი ქვეყნის მაღალი რანგის წარმომადგენელს გააერთიანებს.

კონგრესი 9 ოქტომბერს, პარასკევს, „სახალხო დღის“ ღონისძიებებით დასრულდება, რომელიც საზოგადოების ყველა ფენას კოსმოსურ მეცნიერებასა და ტექნოლოგიებთან დააახლოებს.

ღონისძიება, რომელიც გასულ წელს ავსტრალიის ქალაქ სიდნეიში ჩატარდა, მომავალ წელს პოლონეთის ქალაქ პოზნანში გაიმართება.

კონგრესი, რომელიც 9 ოქტომბრამდე გაგრძელდება, 1951 წელს დაარსებულ და 82 ქვეყნის 604 წევრისგან შემდგარ IAF-თან პარტნიორობით ხორციელდება.