ირანის არმიის პრესსპიკერმა, ბრიგადის გენერალმა მოჰამედ აქრემინიამ განაცხადა, რომ აშშ-ის მხრიდან ნებისმიერი ახალი თავდასხმის შემთხვევაში, ირანი წარსულთან შედარებით უფრო მასშტაბურ, გამანადგურებელ და მყისიერ პასუხს გასცემს და ომი რეგიონით არ შემოიფარგლება.
ირანული საინფორმაციო სააგენტო Mehr-ის ცნობით, არმიის პრესსპიკერმა აქრემიინიამ რადიოპროგრამაში მონაწილეობა მიიღო და აქტუალურ საკითხებზე ისაუბრა.
აქრემიინიას თქმით, აშშ-ის თავდასხმის მუქარების საპასუხოდ, „მტრის სამიზნეთა სია“ განახლდა, ხოლო შეიარაღებული ძალების თავდაცვითი და შეტევითი შესაძლებლობები გაძლიერდა.
„აშშ-ის მხრიდან ნებისმიერი ახალი აგრესიის საპასუხოდ, წარსულთან შედარებით უფრო მასშტაბურ, გამანადგურებელ და მყისიერ პასუხს გავცემთ. ახალი ომის შემთხვევაში კი მისი გეოგრაფიული არეალი დასავლეთ აზიის რეგიონით არ შემოიფარგლება“, - განაცხადა მან.
მანამდე გავრცელდა ინფორმაცია, რომ ირანის უზენაესმა ლიდერმა, აიათოლა მოჯთაბა ხამენეიმ, 31 ოქტომბერს, მაღალი რანგის სამხედრო პირებთან შეხვედრისას, გასცა ბრძანება, რომ ნებისმიერ თავდასხმას დაუყოვნებლივ, ეფექტიანი და გეოგრაფიული საზღვრების გაუთვალისწინებელი პასუხი გასცემოდა. შეხვედრას ესწრებოდნენ გენერალური შტაბის უფროსი, გენერალ-მაიორი ალი აბდულაჰი, ირანის არმიის მეთაური, გენერალ-მაიორი ამირ ხათემი და ისლამური რევოლუციის გუშაგთა კორპუსის მეთაური, გენერალ-მაიორი აჰმად ვაჰიდი.
