ამერიკის შეერთებული შტატების სახელმწიფო მდივანმა მარკო რუბიომ განაცხადა, რომ ვაშინგტონი განიხილავს სხვადასხვა წინადადებას, მათ შორის თურქეთის მიერ წარდგენილ ინიციატივას, რომელიც შავი ზღვის გავლით მარცვლეულის გადაზიდვის ხელშეწყობას ისახავს მიზნად. რუბიომ ხაზგასმით აღნიშნა, რომ რუსეთ-უკრაინის ომის გაგრძელების ფონზე, სასურსათო უსაფრთხოების დაცვისკენ მიმართული ძალისხმევა აუცილებლად უნდა გაგრძელდეს.

შაბათს, ატლანტაში გამართული G20-ის საგარეო საქმეთა მინისტრების შეხვედრის შემდგომ პრესკონფერენციაზე საუბრისას, რუბიომ თქვა, რომ თურქეთმა და ინდოეთმა წარადგინეს წინადადებები ომის გამო შეფერხებული მარცვლეულის გადაზიდვების განახლების თაობაზე.

„ამ საკითხთან დაკავშირებით თურქეთისგან მიღებულ წინადადებებს განვიხილავთ და გავაგრძელებთ მათ შესწავლას“, - განაცხადა რუბიომ. მან აღნიშნა, რომ ვაშინგტონი მიესალმება ინიციატივებს, რომლებიც ხელს შეუწყობს ასეთი შეთანხმების მიღწევას.

თუმცა რუბიომ იქვე გააფრთხილა, რომ მსგავსი ნაბიჯი ომს მთლიანობაში ვერ მოაგვარებს.

„ეს ომს არ ასრულებს, მაგრამ სულ მცირე, წყვეტს კონკრეტულ პრობლემას, რომელიც ომმა გამოიწვია“, - თქვა მან. რუბიომ ყურადღება გაამახვილა იმაზე, რომ შავი ზღვის სავაჭრო მარშრუტების შეფერხება უარყოფითად აისახება გლობალურ სასურსათო უსაფრთხოებაზე, განსაკუთრებით კი მოწყვლად ქვეყნებში.

რუბიოს თქმით, შეთანხმების მიღწევის მიმართ საერთაშორისო ინტერესი კვლავ გაიზარდა და ზოგიერთი ქვეყანა გარანტორის ან ფასილიტატორის (მედიატორის) როლის შესრულებას განიხილავს.

რუსეთთან კომუნიკაციის შენარჩუნება

რუსეთ-უკრაინის ომის შეფასებისას რუბიომ განაცხადა, რომ მოლაპარაკებების გზით საკითხის მოსაგვარებლად აუცილებელია კომუნიკაცია ორივე მხარესთან, და მოსკოვთან დიპლომატიური არხების ღიად დატოვებას მხარი დაუჭირა.

„თუ არ გაქვთ შესაძლებლობა, ესაუბროთ როგორც რუსეთს, ისე უკრაინას, როგორ შეგიძლიათ მიაღწიოთ მოლაპარაკებების გზით შეთანხმებას ამ ორ ქვეყანას შორის?“ - დასვა კითხვა რუბიომ.

„ყველა სხვა საკითხი რომც გვერდზე გადავდოთ, მომავალში დაძაბულობის ესკალაციის საფრთხის გამო, აშშ-სა და რუსეთს შორის გარკვეულ დონეზე კონტაქტის შენარჩუნება ყოველთვის მნიშვნელოვანია“, -აღნიშნა სახელმწიფო მდივანმა.

რუბიომ დასძინა, რომ ვაშინგტონი მტკიცედ აპირებს გააგრძელოს ძალისხმევა ომის დიპლომატიური გზით დასასრულებლად, თუმცა უახლოეს პერიოდში გარღვევა მოსალოდნელი არ არის.