საბერძნეთში გამომავალმა გაზეთმა Kathimerini-მ გამოთქვა მოსაზრება, რომ ანკარაში 7-8 ივლისს დაგეგმილ ნატოს სამიტზე ალიანსის ფარგლებში თურქეთის როლის კიდევ უფრო გაძლიერების შესაძლებლობა ისრაელში უკმაყოფილებას იწვევს.

გაზეთ Kathimerini-ს სტატიის მიხედვით, ის ფაქტი, რომ ანკარის სამიტზე თურქეთის როლის ზრდა ნატოს შიგნით ისრაელს აშფოთებს, ისრაელის პრემიერ-მინისტრ ბენიამინ ნეთანიაჰუს ბოლოდროინდელი ქმედებებიდანაც ჩანს.

გამოცემამ ისრაელის მთავრობის მიერ გასულ კვირას 1915 წლის მოვლენებთან დაკავშირებით სომხური პრეტენზიების აღიარება სწორედ ამ უკმაყოფილების შედეგად შეაფასა.

სტატიაში აღნიშნულია, რომ ნეთანიაჰუს სიტყვები - „არ არსებობს დღე, როდესაც პრეზიდენტ (რეჯეფ თაიფ) ერდოღანს ისრაელის განადგურება არ სურდეს“ - სიმართლეს არ შეესაბამება. მასში ნათქვამია: „ერდოღანს არასდროს უხსენებია ისრაელის განადგურება, თუმცა, როგორც ნატოს ერთადერთი მუსლიმური ქვეყნის ლიდერმა, მან მკაცრად გააკრიტიკა ისრაელის ქმედებები ღაზაში“.

გარდა ამისა, სტატიაში ყურადღება გამახვილებულია იმაზე, რომ 1492 წელს კათოლიკური ესპანეთიდან გაძევებულმა ებრაელებმა თავშესაფარი ოსმალეთის იმპერიაში ჰპოვეს. პუბლიკაციაში გამოყენებულია ფრაზა: „ნაციონალისტურ თურქეთშიც არასდროს ყოფილა ისეთი ანტისემიტიზმი, როგორიც ქრისტიანულ ევროპაში“.