დროებითმა პრეზიდენტმა დელსი როდრიგესმა განაცხადა, რომ ვენესუელაში მომხდარი ძლიერი მიწისძვრების შედეგად სულ მცირე 32 ადამიანი დაიღუპა და 700-ზე მეტი დაშავდა.
ხუთშაბათს, ერისა და მიმართვისას როდრიგესმა აღნიშნა: „ამ დროისთვის გვაქვს ინფორმაცია 32 დაღუპულისა და 700-ზე მეტი დაშავებულის შესახებ“. მან ასევე დაამატა, რომ დედაქალაქთან ახლოს მდებარე ლა-გუაირას რეგიონიდან, რომელიც ყველაზე მეტად დაზარალდა, მონაცემები ჯერ კიდევ არ არის სრულად მიღებული.
ოთხშაბათს გვიან ღამით, ქვეყნის ჩრდილოეთ კარიბის ზღვის სანაპიროზე მომხდარი ძლიერი მიწისძვრების შემდეგ, რომლებმაც დიდი ზიანი გამოიწვია და რეგიონში ცუნამის საფრთხის შესახებ გაფრთხილებების საფუძველი გახდა, ქვეყნის მასშტაბით საგანგებო მდგომარეობა გამოცხადდა.
მთავარი მიწისძვრა
ინტერნეტ-მონიტორინგის ჯგუფ NetBlocks-ის ინფორმაციით, მას შემდეგ, რაც მიწისძვრებმა ქვეყნის ელექტროენერგიისა და ტელეკომუნიკაციების ინფრასტრუქტურა დააზიანა, ვენესუელაში, მათ შორის დედაქალაქ კარაკასში, ინტერნეტკავშირი მკვეთრად გაუარესდა.
აშშ-ის გეოლოგიური სამსახურის (USGS) უახლესი მონაცემებით, ვენესუელის ჩრდილოეთი ორმა დიდმა მიწისძვრამ შეარყია. სეისმოლოგებმა დაადასტურეს, რომ პირველი, 7.2 მაგნიტუდის ბიძგები იარაკუის შტატის დედაქალაქ სან-ფელიპეს მახლობლად დაფიქსირდა. სულ რაღაც 40 წამის შემდეგ, იუმარეს სამხრეთ-აღმოსავლეთით უფრო დამანგრეველი, 7.5 მაგნიტუდის ძირითადი მიწისძვრა მოხდა.
დელსი როდრიგესმა ასევე დაადასტურა სატრანსპორტო ხაზების სერიოზული შეფერხება და აღნიშნა, რომ მაიკეტიის სიმონ ბოლივარის საერთაშორისო აეროპორტი განუსაზღვრელი ვადით დაიკეტა ტერმინალებისა და ასაფრენი ბილიკების ინფრასტრუქტურის მნიშვნელოვანი დაზიანების გამო.
„შემაშფოთებელი ვითარება“
ვენესუელის შინაგან საქმეთა მინისტრმა დიოსდადო კაბელომ ადგილობრივ მედიასთან განაცხადა, რომ ძლიერმა ბიძგებმა სტრუქტურული დაზიანებები და სახლებისა და შენობების ნგრევა გამოიწვია.
„უსაფრთხოებისა და საგანგებო რეაგირების ყველა დანაყოფი, მათ შორის სამოქალაქო თავდაცვა, მოხალისეები, მეხანძრეები და პოლიცია, სრულად არის მობილიზებული“, - განაცხადა კაბელომ სახელმწიფო ტელევიზიის პირდაპირ ეთერში.
მინისტრმა კაბელომ ასევე დაამატა: „გირჩევთ დარჩეთ გარეთ, მიხედოთ ბავშვებსა და მოხუცებს და შეინარჩუნოთ სიმშვიდე, სანამ სამაშველო ოქმები სრულად ამოქმედდება“.
სტრუქტურული დაზიანებებისა და ელექტროენერგიის გათიშვის ფონზე, როდრიგესმა მადლობა გადაუხადა გაერთიანებული ერების ორგანიზაციას, მრავალმხრივ ინსტიტუტებსა და სხვადასხვა უცხოურ მთავრობებს სოლიდარობისა და ჰუმანიტარული დახმარების შეთავაზებისთვის.
როდრიგესმა განსაკუთრებული მადლობა გადაუხადა კოლუმბიას, ბრაზილიას, მექსიკას, თურქეთს, იორდანიას, ბარბადოსს, კიურასაოსა და დიდ ბრიტანეთს გაწეული მხარდაჭერისთვის, მათ შორის სამაშველო ოპერაციებში დახმარებისთვის.
ბრაზილიის პრეზიდენტმა ლუის ინასიო ლულა და სილვამ განაცხადა, რომ ქვეყნის საგარეო საქმეთა სამინისტროს დაავალა ვენესუელაში არსებული ვითარებისა და ბრაზილიის მიერ გასატარებელი დახმარების ზომების შეფასება.
წყნარი ოკეანის ცუნამის გაფრთხილების ცენტრმა (PTWC) გამოსცა გაფრთხილება ვენესუელის სანაპირო ზოლისა და მეზობელი კუნძულებისათვის - არუბა, ბონეირი და კიურასაო.
ცუნამის საფრთხე ასევე გამოცხადდა პუერტო-რიკოსა და აშშ-ის ვირჯინიის კუნძულებისთვის. ხელისუფლება აქტიურად აკვირდება სანაპიროზე მოქცევის საზომ ხელსაწყოებს არაჩვეულებრივი ტალღური მოძრაობების გამოსავლენად.
