აშშ-მა კუბის ხელისუფლებისა და მისი „სამხედრო ელიტის“ წინააღმდეგ ეკონომიკური ზეწოლის ტალღის ბოლო ეტაპის ფარგლებში ჰავანის მთავრობასთან დაკავშირებული რვა ორგანიზაციის, ორი ფიზიკური პირისა და ხუთი ნავთობტანკერის წინააღმდეგ სანქციების დაწესების გადაწყვეტილება მიიღო. 

აშშ-ის სახელმწიფო დეპარტამენტის მიერ გავრცელებულ განცხადებაში აღნიშნულია, რომ კუნძულოვანი სახელმწიფოს წინააღმდეგ დაწესებული ახალი სანქციები მიმართულია კუბის არმიის „უკანონო“ შემოსავლის წყაროების, ენერგომომარაგების კავშირების, მთავრობის შიგნით არსებული „ელიტის“ და ქვეყნის შეიარაღებული ძალებისთვის აღჭურვილობის მიმწოდებელი ჩინური თავდაცვითი კონტრაქტორების წინააღმდეგ. 

აშშ-ის სახელმწიფო მდივანმა მარკო რუბიომ სანქციებთან დაკავშირებით განაცხადა: „ტრამპის ადმინისტრაცია გულხელდაკრეფილი არ შეხედავს იმას, თუ როგორ გადასცემს კუბის რეჟიმი კუნძულის რესურსებს საკუთარ სამხედრო ელიტას, როგორ იღებენ მოგებას რეჟიმის წარმომადგენლები და მათი ოჯახის წევრები გაუმჭვირვალე ოფშორული ქსელებიდან და როგორ აგრძელებს კუბა ბაზად ყოფნას მტრულად განწყობილი ანტიამერიკული აქტორების გლობალური კოალიციისთვის, რათა დაემუქროს აშშ-სა და მის ინტერესებს, აწარმოოს ჯაშუშობა და მოაწყოს შეთქმულებები“. 

მიღებული ზომების ფარგლებში, სანქციების სიაში მოხვდა ორი ჩინური სახელმწიფო თავდაცვითი კონტრაქტორი, რომლებიც კუბის შეიარაღებულ ძალებს მომარაგების კომპანია „Sociedad Mercantil Duna S.A.“-ის მეშვეობით მასალებითა და ტექნოლოგიებით უჭერდნენ მხარს. 

გარდა ამისა, ოფიციალურმა პირებმა სანქციები დაუწესეს ანი როდრიგეს ლასტრესს — მარიელის საკონტეინერო ტერმინალის ლოჯისტიკისა და საპორტო ინფრასტრუქტურის ყოფილ კომერციულ დირექტორსა და არმიის კომერციული ჰოლდინგის, GAESA-ს ხელმძღვანელის, ანია გილერმინა ლასტრეს მორერას ქალიშვილს. 

ამასთანავე აღინიშნა, რომ აშშ-ის სანქციების სიაში კუბაში ნავთობის გადამზიდავი 5 ტანკერიც მოხვდა. 

ვაშინგტონის მიერ მიღებული ბოლო სანქციების გადაწყვეტილების შემდეგ, კუბის საგარეო საქმეთა მინისტრმა ბრუნო როდრიგესმა სოციალურ პლატფორმა X-ზე გამოქვეყნებულ პოსტში განაცხადა: „ვგმობთ იმ ფაქტს, რომ ბოლო 10 თვის განმავლობაში კუბელი ხალხი განიცდის აშშ-ის ეკონომიკური ბლოკადის უპრეცედენტო გამკაცრებას, საზღვაო ბლოკადის ეკვივალენტურ ენერგეტიკულ ალყასა და მეორადი სანქციების დაწესებას“. 

აშშ-ის პრეზიდენტმა დონალდ ტრამპმა, 3 ნოემბრის კონგრესის შუალედურ არჩევნებამდე ცოტა ხნით ადრე, კუბაში ოპერაციის ჩატარების შესაძლებლობის შესახებ დასმულ კითხვაზე უპასუხა: „ეს ჩავარდნილი ქვეყანაა. ძალიან მალე იქ კვლავ გავგზავნით ჩვენს ხალხს“ — და აღნიშნა, რომ სახელმწიფო მდივანი მარკო რუბიო ამ კუნძულოვანი ქვეყნის გარშემო შექმნილ ვითარებას ყურადღებით აკვირდება.