ეგვიპტის დედაქალაქ კაიროში, ერთ-ერთ სავაჭრო ცენტრში მომხდარი აფეთქების შედეგად 3 ადამიანი გარდაიცვალა, 17 კი დაშავდა.

კაიროს რაიონში მდებარე სავაჭრო ცენტრ „Arabella Plaza“-ს პირველ სართულზე, საჩუქრებისა და სათამაშოების მაღაზიაში, ჰელიუმის გაზის ბალონის აფეთქების შედეგად ხანძარი გაჩნდა. შემთხვევას 3 ადამიანის სიცოცხლე ემსხვერპლა, 17-მა კი სხვადასხვა დაზიანება მიიღო.

ეგვიპტის შინაგან საქმეთა სამინისტროს მიერ გავრცელებულ განცხადებაში ნათქვამია, რომ აფეთქება სავაჭრო ცენტრ „Arabella Plaza“-ში მოხდა, რის შემდეგაც გაჩენილი მცირე მასშტაბის ხანძარი სამოქალაქო თავდაცვის ჯგუფებმა დროულად აიღეს კონტროლზე. აფეთქების ტალღამ მეზობლად მდებარე რამდენიმე მაღაზიის ვიტრინებიც დააზიანა.

ეგვიპტის გენერალურმა პროკურატურამ გასცა იმ მაღაზიის მფლობელის დაკავების ბრძანება, სადაც აფეთქება მოხდა. პროკურატურის განცხადებით, პირველადი მოკვლევით დადგინდა, რომ აფეთქება გაზის ბალონმა გამოიწვია. შემთხვევის ზუსტი მიზეზების დასადგენად დანიშნულია ექსპერტთა ჯგუფები.

მომხდარზე გამოძიება გრძელდება.