ირანის საგარეო საქმეთა მინისტრმა, აბას არაღჩიმ განაცხადა, რომ ამერიკის შეერთებულ შტატებთან ამჟამად არანაირი მოლაპარაკება არ მიმდინარეობს. მისი თქმით, მოლაპარაკებები არ განახლდება მანამ, სანამ ვაშინგტონის ადმინისტრაცია არ გამოასწორებს ურთიერთგაგების მემორანდუმით გათვალისწინებული პუნქტების დარღვევებს.
ირანის სახელმწიფო ტელევიზიასთან საუბრისას არაღჩიმ კომენტარი გააკეთა აშშ-სთან კონტაქტებსა და ჰორმუზის სრუტის საკითხთან დაკავშირებით.
მინისტრმა აღნიშნა, რომ მხარეებს შორის შუამავლების მეშვეობით შეტყობინებების გაცვლა გრძელდება: „ამჟამად აშშ-სთან არანაირ მოლაპარაკებებს არ ვაწარმოებთ. შუამავლების მეშვეობით ხდება გზავნილების გაცვლა, მაგრამ ამას მოლაპარაკება არ ეწოდება“.
მისივე თქმით, შუამავლები აგრძელებენ მუშაობას ურთიერთგაგების საფუძვლის ხელახლა შესაქმნელად, თუმცა მოლაპარაკებების ხელახლა დასაწყებად აშშ-მ უნდა შეასრულოს ურთიერთგაგების მემორანდუმის დარღვევასთან დაკავშირებული ვალდებულებები.
„ვიდრე მემორანდუმის დარღვევა არ შეწყდება და სანამ აშშ არ აანაზღაურებს იმ ზიანს, რომელიც მემორანდუმის პუნქტების დარღვევით გამოიწვია, მოლაპარაკებების განახლება შეუძლებელია“, - განაცხადა აბას არაღჩიმ.
ირანმა ჰორმუზის სრუტის გახსნისთვის წაყენებული პირობები შუამავლების მეშვეობით ამერიკულ მხარეს გადასცა
რაც შეეხება ჰორმუზის სრუტის საკითხზე ომანთან წარმოებულ მოლაპარაკებებს, არაღჩიმ ხაზგასმით აღნიშნა, რომ ამ ქვეყანასთან შეთანხმების მიღწევა ავტომატურად არ ნიშნავს ჰორმუზის სრუტის ხელახლა გახსნას.
„ომანთან წარმოებული მოლაპარაკებები არ ნიშნავს, რომ ჰორმუზის სრუტე გაიხსნება. ამის განსახორციელებლად საჭიროა სხვა პირობების დაკმაყოფილებაც. ეს პირობები შუამავლების მეშვეობით აშშ-ს მხარეს უკვე გადაეცა“, - განაცხადა მან.
