პრეზიდენტი ერდოღანი ვიეტნამის პრეზიდენტ ტო ლამს შეხვდა.
შეხვედრაზე თურქეთ-ვიეტნამის ურთიერთობები, რეგიონული და გლობალური საკითხები განიხილეს.
პრეზიდენტმა ერდოღანმა კმაყოფილება გამოთქვა იმის გამო, რომ ვიეტნამმა დადებითად უპასუხა თურქეთის წინადადებას ორ ქვეყანას შორის ურთიერთობების „სტრატეგიული პარტნიორობის“ დონეზე აყვანის შესახებ და აღნიშნა, რომ ისინი მუშაობენ ვიეტნამთან თანამშრომლობის გასავითარებლად მრავალ სფეროში, პირველ რიგში კი ინვესტიციების, ვაჭრობისა და თავდაცვის მრეწველობის მიმართულებით.
ერდოღანი ლიბიის საპრეზიდენტო საბჭოს თავმჯდომარეს, მუჰამედ იუნუს ალ-მენფისაც შეხვდა.
შეხვედრაზე, სადაც თურქეთ-ლიბიის ურთიერთობები, რეგიონული და გლობალური საკითხები განიხილეს, ერდოღანმა განაცხადა, რომ თურქეთი ძალისხმევას არ იშურებს ლიბიაში სტაბილურობის შესანარჩუნებლად, მნიშვნელოვანია დიალოგსა და კონსენსუსზე ორიენტირებული პროცესის გაგრძელება და თურქეთი არ დათანხმდება არცერთ ისეთ ფორმულას, რომელიც ლიბიის ინტერესებს არ შეესაბამება.
ერდოღანმა აღნიშნა, რომ გრძელდება მუშაობა ორ ქვეყანას შორის ენერგეტიკის, თავდაცვისა და სამთო-მოპოვებით სფეროებში თანამშრომლობის გასაღრმავებლად.
შემდეგ ერდოღანი ქუვეითის ტახტის მემკვიდრე პრინცს, საბაჰ ხალიდ ალ-ჰამად ას-საბაჰს შეხვდა.
შეხვედრაზე თურქეთ-ქუვეითის ორმხრივი ურთიერთობები, რეგიონული და გლობალური საკითხები განიხილეს.
შეხვედრაზე ერდოღანმა ხაზი გაუსვა, რომ ორი ქვეყანა მუშაობს თანამშრომლობის განვითარებაზე მრავალ სფეროში, განსაკუთრებით ვაჭრობასა და ენერგეტიკაში, და კიდევ ერთხელ განაცხადა, რომ რეგიონში მიმდინარე რთულ და კონფლიქტურ პროცესში თურქეთი ქუვეითის მსგავსი მოძმე ქვეყნების გვერდით დგას.
პრეზიდენტმა ერდოღანმა ხაზგასმით აღნიშნა რეგიონში ისრაელის აგრესიის შეჩერების აუცილებლობა და ყურადღება გაამახვილა ამის უზრუნველსაყოფად საერთაშორისო ძალისხმევის მხარდაჭერის მნიშვნელობაზე.
ერდოღანმა კოსოვოს პრემიერ-მინისტრი ალბინ კურტიც მიიღო.
შეხვედრაზე თურქეთ-კოსოვოს ორმხრივი ურთიერთობები, რეგიონული და გლობალური საკითხები განიხილეს.
პრეზიდენტმა ერდოღანმა შეხვედრაზე განაცხადა, რომ ისინი გააგრძელებენ ნაბიჯების გადადგმას ორ ქვეყანას შორის სავაჭრო ბრუნვის პოტენციალის შესაბამისად გასაზრდელად და ასევე გააღრმავებენ თანამშრომლობას უსაფრთხოებისა და თავდაცვის მრეწველობის სფეროებში.
ერდოღანმა აღნიშნა, რომ თურქეთი გააგრძელებს კოსოვოს მხარდაჭერას საერთაშორისო ასპარეზზე კუთვნილი ადგილის დასაკავებლად და რომ თურქეთი ასევე მხარს უჭერს ბალკანეთის ქვეყნებს შორის დიალოგს.
მოგვიანებით ერდოღანი ლიბანის პრემიერ-მინისტრ ნავაფ სალამს შეხვდა.
შეხვედრაზე ერდოღანმა განაცხადა, რომ თურქეთი ძალისხმევას მიმართავს ლიბანში მუდმივი მშვიდობისა და სტაბილურობის უზრუნველსაყოფად, საჭიროა საერთაშორისო ინიციატივა გაეროს ლიბანის დროებითი ძალების ჩასანაცვლებლად, და აღნიშნა, რომ რთულ პერიოდში თურქეთი გააგრძელებს ლიბანელი ხალხის გვერდში დგომას და ლიბანისთვის ჰუმანიტარული და სამედიცინო დახმარების გაგზავნას.
ბოლოს პრეზიდენტმა ერდოღანმა საქართველოს პრემიერ-მინისტრი ირაკლი კობახიძე მიიღო.
შეხვედრაზე თურქეთ-საქართველოს ურთიერთობები, ასევე რეგიონული და გლობალური საკითხები განიხილეს.
პრეზიდენტმა ერდოღანმა შეხვედრაზე კმაყოფილება გამოთქვა იმის გამო, რომ თურქეთი უკვე 18 წელია საქართველოს უმსხვილესი სავაჭრო პარტნიორია და აღნიშნა, რომ ისინი გააგრძელებენ ნაბიჯების გადადგმას თანამშრომლობის კიდევ უფრო გასაღრმავებლად მრავალ სფეროში, პირველ რიგში ვაჭრობის, ტრანსპორტისა და უსაფრთხოების მიმართულებით.
ერდოღანმა ხაზი გაუსვა ორ ქვეყანას შორის საერთაშორისო ასპარეზზე სოლიდარობის გაგრძელების მნიშვნელობას და აღნიშნა, რომ თურქეთი-საქართველო-აზერბაიჯანის თანამშრომლობის მექანიზმების მაქსიმალურად ეფექტიანი გამოყენება ქვეყნებისთვის სასარგებლო იქნება.
