გაერთიანებული ერების ორგანიზაციის გენერალურმა მდივანმა ანტონიუ გუტერეშმა მიანმარში განხორციელებული საჰაერო თავდასხმა, რომელსაც 50 ადამიანი ემსხვერპლა, „მკაცრად“ დაგმო.

გაეროს გენერალური მდივნის პრესსპიკერმა სტეფან დიუჟარიკმა ყოველდღიურ პრესკონფერენციაზე ისაუბრა.

„შეშფოთებული ვართ არაკანის შტატში 28 სექტემბერს მომხდარი საჰაერო თავდასხმის შესახებ გავრცელებული ცნობებით, რასაც 50 ადამიანის დაღუპვა და დაახლოებით 60-ის დაშავება მოჰყვა“, - განაცხადა დიუჟარიკმა და აღნიშნა, რომ გენერალური მდივანი მომხდარ თავდასხმებს „მკაცრად გმობს“.

დიუჟარიკმა ყურადღება გაამახვილა იმაზე, რომ დაშავებულთაგან ბევრის მდგომარეობა მძიმეა და დაღუპულთა ოჯახებს სამძიმარი გამოუცხადა.

მისივე თქმით, გენერალურმა მდივანმა გუტერეშმა ყველა მხარეს ძალადობის დაუყოვნებლივ შეწყვეტისკენ მოუწოდა და ასევე ხაზგასმით აღნიშნა, რომ აღნიშნული საჰაერო თავდასხმის განმახორციელებლებმა პასუხი უნდა აგონ.

გაეროს ადამიანის უფლებათა უმაღლესმა კომისარმა ფოლკერ ტიურკმაც განაცხადა, რომ გმობს მიანმარის არაკანის შტატში, ბაზრის სიახლოვეს განხორციელებულ საჰაერო იერიშებს, რასაც სულ მცირე 50 ადამიანი ემსხვერპლა.