აშშ-ის პრეზიდენტმა დონალდ ტრამპმა უარყო ცნობები იმის შესახებ, რომ იგი მზადაა ირანის მიმართ დაწესებული სანქციები შეამსუბუქოს და ქვეყნის გაყინული სახსრები განათავისუფლოს, თუ ირანი ბირთვულ პროგრამასთან დაკავშირებით კონკრეტულ ნაბიჯებს გადადგამს.
დონალდ ტრამპმა აღნიშნულ საკითხთან დაკავშირებით სოციალურ ქსელში გააკეთა განცხადება. საინფორმაციო პლატფორმა Axios-ის სტატია, სადაც ნათქვამი იყო, რომ ტრამპი თეირანის წინააღმდეგ დაწესებული სანქციების შემსუბუქების მომხრეა, მან უარყო და განაცხადა: „ეს სიმართლე არ არის, მათთვის არაფერი შემითავაზებია“.
ტრამპმა აღნიშნული ინფორმაცია უსაფუძვლოდ მიიჩნია და განაცხადა, რომ ის დაუყოვნებლივ უნდა წაიშალოს.
Axios-ის სტატიაში, რომელიც აშშ-ის ანონიმურ მაღალჩინოსნებზე დაყრდნობით მომზადდა, ნათქვამი იყო, რომ ტრამპი მზად იყო სანქციების შემსუბუქებისა და ირანული ფონდების განთავისუფლებისთვის, სანაცვლოდ კი თეირანისგან ბირთვული პროგრამის მიმართ კონკრეტულ ნაბიჯებს ითხოვდა.
სტატიაში ასევე აღნიშნული იყო, რომ ეს საკითხი მაშინ წამოიჭრა, როდესაც კატარელი და პაკისტანელი შუამავლები აშშ-სა და ირანს შორის შეთანხმების მიღწევის მიზნით დიპლომატიურ მოლაპარაკებებს აწარმოებდნენ.
