ჩინეთის პრეზიდენტის, სი ძინპინის აშშ-ში ვიზიტისას და მანამდე ორი ქვეყნის ეკონომიკურ დელეგაციებს შორის ნიუ-იორკსა და ვაშინგტონში გამართულ შეხვედრებზე მხარეებმა მიაღწიეს შეთანხმებას 30 მილიარდი დოლარის ღირებულების საქონლით ვაჭრობაზე საბაჟო ტარიფების ორმხრივ შემცირებაზე, ჩინეთის მიერ აშშ-დან ქვანახშირის იმპორტზე, სასოფლო-სამეურნეო პროდუქციასა და ფინანსურ მომსახურებაზე ბაზრის ორმხრივ წვდომასა და ხელოვნური ინტელექტის საკითხებზე დიალოგის დაწყებაზე.

ჩინეთის ვაჭრობის სამინისტროს განცხადებით, კონსულტაციების დროს მხარეები შეთანხმდნენ ორ ქვეყანას შორის ვაჭრობის ხელშეწყობის მიზნით „სავაჭრო საბჭოს“ შექმნაზე, ხოლო ამ საბჭოს ფარგლებში გამართული კონსულტაციების შედეგად — 30 მილიარდი დოლარის ღირებულების საქონლით ვაჭრობაში ტარიფების ორმხრივ შემცირებაზე.

განცხადებაში აღნიშნულია, რომ ამ ჩარჩოში ქვანახშირის იმპორტიც მოექცა ტარიფების ორმხრივი შემცირების ქვეშ და 2027 და 2028 წლებში ჩინეთი აშშ-დან ქვანახშირის იმპორტს განახორციელებს.

განცხადების თანახმად, ორ ქვეყანას შორის ეკონომიკურ-სავაჭრო კონსულტაციების მექანიზმის ფარგლებში მხარეები შეთანხმდნენ „საინვესტიციო საბჭოს“ შექმნასა და პოტენციურ ინვესტიციებსა და მათ წინაშე არსებულ დაბრკოლებებზე ინსტიტუციური საკომუნიკაციო პლატფორმის უზრუნველყოფაზე.

ამასთანავე, განცხადებაში ნათქვამია, რომ სავაჭრო საბჭოს ფარგლებში შეიქმნება სოფლის მეურნეობის სამუშაო ჯგუფი, რომელიც აწარმოებს მოლაპარაკებებს ორივე ქვეყნის სასოფლო-სამეურნეო პროდუქციაზე ბაზრის ორმხრივი წვდომის უზრუნველსაყოფად. მხარეები ასევე პრინციპულად შეთანხმდნენ ფინანსურ მომსახურებაზე წვდომის საკითხზეც; ჩინეთი განიხილავს მთელი მსოფლიოდან (მათ შორის ამერიკული კაპიტალის მქონე) ფინანსური სერვისების მიმწოდებელი ორგანიზაციების განაცხადებს ჩინეთში ფილიალების გახსნისა და საქმიანობის წარმოების შესახებ.

დიალოგი ხელოვნურ ინტელექტზე

განცხადებაში აღნიშნულია, რომ ჩინეთის ვიცე-პრემიერ ხე ლიფენგისა და აშშ-ის ფინანსთა მინისტრ სკოტ ბესენტის ხელმძღვანელობით მოქმედმა დელეგაციებმა დაიწყეს დიალოგი ხელოვნური ინტელექტის საკითხზე და გამართეს პირველი დისკუსია ხელოვნურ ინტელექტთან დაკავშირებულ რისკებსა და სარგებელზე. მხარეები შეთანხმდნენ, რომ დიალოგის მეორე რაუნდი ნოემბრის ბოლომდე გაიმართება და შეიქმნება საკომუნიკაციო არხი ამ ტექნოლოგიასთან დაკავშირებული ინციდენტებისთვის.

ჩინეთის პრეზიდენტი სი ძინპინი გასულ კვირას აშშ-ს ოფიციალური ვიზიტით ეწვია.