იაპონიის მეტეოროლოგიური სააგენტოს განცხადებით, „დუჯუანის“ ტაიფუნი იაპონიის ცენტრალური და აღმოსავლეთი ნაწილის წყნარი ოკეანის სანაპიროებისკენ მიემართება.
ტაიფუნის შედეგად მოსალოდნელი ძლიერი წვიმისა და მეწყრების გამო, ტოკიოდან 100 კილომეტრით სამხრეთით მდებარე იზუს არქიპელაგის უდიდეს კუნძულ იზუ-ოშიმაზე განგაშის უმაღლესი დონე გამოცხადდა.
იაპონიაში ხუთდღიან სადღესასწაულო პერიოდს დამთხვეული ტაიფუნის გამო დედაქალაქ ტოკიოში სატრანსპორტო მომსახურების შეფერხებები დაფიქსირდა, ხოლო ზოგიერთი ღონისძიება გაუქმდა.
ტაიფუნმა 45 ათას ოჯახს ელექტროენერგიის მიწოდება შეუწყვიტა და მოსალოდნელია, რომ ის ტოკიოს აღმოსავლეთით მდებარე ჩიბას პრეფექტურას გადაივლის.
4 ადამიანი დაიღუპა
ტაიფუნმა ტოკიოში ძლიერი წვიმები, ხოლო ჩიბასა და კანაგავას პრეფექტურებში მეწყერები გამოიწვია.
ხელისუფლების წარმომადგენლებმა განაცხადეს, რომ ტაიფუნის გამო ჩიბასა და კანაგავას პრეფექტურებში 4 ადამიანი დაიღუპა.
ავიაკომპანიებმა All Nippon Airways-მა და Japan Airlines-მა განაცხადეს, რომ ტოკიოს ჰანედას აეროპორტიდან გამავალი და იქ მიმავალი 270-ზე მეტი რეისი გაუქმდა, რაც დაახლოებით 40 ათას ადამიანს შეეხო.
გაზეთ Nikkei-ს ცნობით, ტოკიოსა და მის მიმდებარე ექვს პრეფექტურაში ჯამში 1,9 მილიონი ადამიანი იქნა ევაკუირებული.
