თურქეთის იუსტიციის მინისტრმა, აქინ გიურლექმა, განაცხადა, რომ ნეთანიაჰუს წინააღმდეგ „გენოციდის“ მუხლით მიმდინარე სისხლისსამართლებრივი დევნის ფარგლებში, მოთხოვნილია წითელი ცირკულარის (საერთაშორისო ძებნის ორდერის) გამოცემა.
მინისტრმა გიურლექმა სოციალურ ქსელში გამოქვეყნებულ განცხადებაში ხაზგასმით აღნიშნა, რომ მტკიცედ გრძელდება სამართლებრივი პროცესი საერთაშორისო წყლებში „გლობალური სუმუდის ფლოტილიის“ აქტივისტებზე განხორციელებულ თავდასხმასთან დაკავშირებით, რომლებიც ღაზაში ჰუმანიტარული დახმარების ჩასატანად მიემგზავრებოდნენ.
ამ კონტექსტში გიურლექმა აღნიშნა, რომ სტამბოლის მე-11 მძიმე დანაშაულთა სასამართლო აწარმოებს დევნას 35 ბრალდებულის მიმართ, რომელთა შორის არიან ნეთანიაჰუ და აფეკ მოსკოვიჩი. მან განაცხადა:
„საქმის ფარგლებში, ნეთანიაჰუსა და აფეკ მოსკოვიჩის მიმართ „გენოციდის“ მუხლით 2026 წლის 14 ივლისს გაცემული დაკავების ორდერების საფუძველზე, ჩვენმა იუსტიციის სამინისტრომ შინაგან საქმეთა სამინისტროსგან მოითხოვა წითელი ცირკულარის გამოცემა მათი საერთაშორისო დონეზე ძებნის მიზნით; შესაბამისი დოკუმენტაცია გადაეგზავნა საგარეო საქმეთა სამინისტროს“.
გიურლექმა აღნიშნა, რომ ნეთანიაჰუსა და მოსკოვიჩს ბრალი ედებათ საერთაშორისო წყლებში იმ სამოქალაქო პირებზე შეიარაღებულ თავდასხმასა და აქტივისტების დაკავებაში, რომლებსაც ღაზაში ჰუმანიტარული დახმარება გადაჰქონდათ. კერძოდ, საქმე აღძრულია შემდეგი მუხლებით: „დანაშაული კაცობრიობის წინააღმდეგ“, „გენოციდი“, „თავისუფლების უკანონო აღკვეთა დამამძიმებელ გარემოებებში“, „განზრახ დასახიჩრება“, „წამება/ტანჯვა“, „ქონების დაზიანება“, „ყაჩაღობა დამამძიმებელ გარემოებებში“ და „სატრანსპორტო საშუალებების გატაცება“.
იუსტიციის მინისტრის განცხადებით, ისინი არავითარ შემთხვევაში არ ეთანხმებიან მოსაზრებას, თითქოს ნეთანიაჰუს ადმინისტრაცია, რომელიც ღაზაში გენოციდის პოლიტიკას ატარებს, ხელშეუხებელია და მას პასუხი არ მოეთხოვება: „ჩვენ არ დავუშვებთ ღაზაში ჩადენილი დანაშაულების მიჩქმალვას და პასუხისმგებელი პირების დაუსჯელობის ჯავშნით დაცვას. მტკიცედ გამოვიყენებთ ეროვნული და საერთაშორისო სამართლის ყველა შესაძლებლობას“.
თურქეთმა 2025 წლის ნოემბერში ღაზაში გენოციდში მათი როლის გამო ნეთანიაჰუსა და სხვა რამდენიმე ეჭვმიტანილის მიმართ დაკავების ორდერი გასცა.
დაკავების ორდერები გაიცა მას შემდეგ, რაც ჩატარდა ყოვლისმომცველი გამოძიება ღაზაში სამოქალაქო პირებზე ისრაელის „სისტემატურ“ თავდასხმებთან, გენოციდურ ქმედებებთან და კაცობრიობის წინააღმდეგ მიმართულ დანაშაულებთან დაკავშირებით.
