გაზეთ „ვაშინგტონ პოსტის“ ინფორმაციით, ცენტრალური სადაზვერვო სააგენტო (CIA) ეჭვით მოეკიდა ისრაელის დაზვერვის მიერ მიწოდებულ ცნობებს აშშ-ის პრეზიდენტის წინააღმდეგ მოსალოდნელი საფრთხის შესახებ. აღნიშნულმა ინფორმაციამ, რომელიც ნატოს სამიტის შემდეგ გავრცელდა, საგანგებო საიდუმლო ფრენის განხორციელება გამოიწვია.

„ვაშინგტონ პოსტის“ ოთხშაბათის ნომერში გამოქვეყნებული სტატიის თანახმად, ამერიკელი სადაზვერვო უწყებების მაღალჩინოსნები ეჭვქვეშ აყენებენ ისრაელის მიერ მიწოდებული ანგარიშის სანდოობას. ანგარიში ეხებოდა ირანის მიერ დონალდ ტრამპის მკვლელობის გეგმას, რამაც გასულ თვეში, პრეზიდენტის მიერ თურქეთის დატოვებისას, უსაფრთხოების უპრეცედენტო ოპერაცია განაპირობა.

სტატიაში, ყოფილ ამერიკელ მაღალჩინოსნებზე დაყრდნობით, აღნიშნულია, რომ CIA-ს ანალიტიკოსებმა ისრაელის მიერ მიწოდებული ინფორმაცია არადამაჯერებლად მიიჩნიეს და თავიანთი ეჭვები ტრამპის ადმინისტრაციას გაუზიარეს. ერთ-ერთმა ამერიკელმა ოფიციალურმა პირმა ეს ანგარიში დაახასიათა როგორც ინფორმაცია, რომელიც „არა ამერიკული, არამედ ისრაელის წყაროებიდან მომდინარეობს და დაბალი სანდოობით გამოირჩევა“.

დაზვერვის ირგვლივ არსებული ეს ეჭვები ახალ დეტალებს ჰმატებს 8 ივლისს, ანკარიდან ტრამპის გამგზავრებისას მიღებულ უსაფრთხოების მკაცრ ზომებს. მანამდე ვრცელდებოდა ინფორმაცია, რომ მას შემდეგ, რაც გაჩნდა ეჭვები კატარის მიერ აშშ-სთვის ნაჩუქარი ახალი „Boeing 747-8“-ის უსაფრთხოებასთან დაკავშირებით, პრეზიდენტი საიდუმლოდ გადაიყვანეს მესამე თვითმფრინავში.

როგორც ირკვევა, ტრამპი აეროპორტში პრეზიდენტის თვითმფრინავიდან სამხედრო თვითმფრინავ C-32A-ში კვების პროდუქტების გადამტანი სატვირთო ავტომობილის (catering truck) მეშვეობით გადასვეს. ამის შემდეგ ტრამპი და მისი მცირე ჯგუფი, F-16 ტიპის გამანადგურებლების თანხლებით, ბრიტანეთის მილდენჰოლის (Mildenhall) საჰაერო ბაზაზე გაფრინდნენ.

საგანგებო ზომები

თეთრ სახლს სადაზვერვო შეფასებებთან დაკავშირებულ კითხვებზე პირდაპირი პასუხი არ გაუცია. ერთ-ერთმა ამერიკელმა მაღალჩინოსანმა განაცხადა, რომ პრეზიდენტი მრავალი საფრთხის წინაშე დგას, მათ შორის ირანის მხრიდან, და მის დასაცავად ყველა საჭირო ზომაა მიღებული. „აშშ-ის საიდუმლო სამსახურის ძირითადი მისია პრეზიდენტის დაცვაა და მათ ეს შეასრულეს“, - აღნიშნა მან.

CIA-მ კომენტარისგან თავი შეიკავა, ხოლო ვაშინგტონში ისრაელის საელჩოს ამ საკითხზე განცხადება არ გაუკეთებია. მიუხედავად დაზვერვის მიმართ არსებული კითხვებისა, საიდუმლო სამსახურმა ჩათვალა, რომ პოტენციური საფრთხე საგანგებო ზომებს მოითხოვდა. „ამ პრეზიდენტთან დაკავშირებით საიდუმლო სამსახურს სამჯერ ჰქონდა კრიტიკული მომენტი, ამიტომ ისინი რისკზე აღარ მიდიან“, - განუცხადა ერთ-ერთმა პირმა „ვაშინგტონ პოსტს“.

თავად ტრამპმა სამშაბათს განაცხადა, რომ სხვა თვითმფრინავით სარგებლობის გადაწყვეტილება საიდუმლო სამსახურმა მიიღო: „მე უბრალოდ მათ მითითებებს ვასრულებ. მთხოვეს სხვა თვითმფრინავში გადაჯდომა და მეც ასე მოვიქეცი“.

ისრაელის განზრახვები ყურადღების ცენტრში

არსებულმა ეჭვებმა გააჩინა კითხვები იმის შესახებ, თუ რატომ გაუზიარა ისრაელმა ეს ინფორმაცია ვაშინგტონს - იყო ეს მხოლოდ გაფრთხილება, თუ აშშ-ის პოლიტიკაზე გავლენის მოხდენის მცდელობა. ზოგიერთი ამერიკელი მზვერავი მიიჩნევს, რომ ისრაელის ანგარიში შესაძლოა მიზნად ისახავდა ტრამპის გადაწყვეტილებების პროცესსა და ვაშინგტონის რეგიონულ მიდგომებზე ზემოქმედებას.

სტატიაში ასევე ნათქვამია, რომ აშშ-ის სახელმწიფო მდივანი მარკო რუბიო ინფორმირებული იყო როგორც ისრაელის ანგარიშის, ისე დაგეგმილი ოპერაციის შესახებ, თუმცა მან მაინც პრეზიდენტის ძველი მოდელის თვითმფრინავით იმგზავრა.