გავრცელებული ინფორმაციით, იემენელ ჰუსიტთა მიერ საუდის არაბეთის აღმოსავლეთ რეგიონის მიმართულებით გაშვებული 3 ბალისტიკური რაკეტა და 4 უპილოტო საფრენი აპარატი (დრონი) საჰაერო თავდაცვის სისტემებმა გაანადგურეს.
საუდის არაბეთის მეთაურობით მოქმედი არაბული კოალიციის განცხადებაში აღნიშნულია, რომ ჰუსიტებმა საუდის არაბეთის აღმოსავლეთ რეგიონის მიმართულებით ბალისტიკური რაკეტები გაუშვეს.
„ტერორისტი ჰუსიტი მებრძოლების მიერ საუდის არაბეთის აღმოსავლეთ რეგიონისკენ გაშვებული 3 ბალისტიკური რაკეტა განადგურდა“, — ნათქვამია განცხადებაში, სადაც ასევე აღნიშნულია, რომ ქვეყნის სამხრეთში დაფიქსირებული 4 უპილოტო საფრენი აპარატი ჩაჭრეს და გაანადგურეს.
საუდის არაბეთის სამოქალაქო თავდაცვის სამმართველომ ცოტა ხნის წინ გაავრცელა ცნობა, რომ ალ-ხარჯის პროვინციასა და აღმოსავლეთ რეგიონში ადრეული გაფრთხილების სისტემები ამოქმედდა.
იემენში ირანის მიერ მხარდაჭერილი ჰუსიტები გარკვეული პერიოდია საუდის არაბეთის დედაქალაქ ერ-რიადსა და სხვა არაერთ რეგიონზე ბალისტიკური რაკეტებითა და დრონებით თავდასხმებს ახორციელებენ.
