გავრცელებული ინფორმაციით, გაეროს გენერალურმა მდივანმა ანტონიუ გუტერეშმა „მკაცრად დაგმო“ რუსეთის საჰაერო თავდასხმები უკრაინის ქალაქებზე, მათ შორის დედაქალაქ კიევზე.

გაეროს გენერალური მდივნის პრესსპიკერმა სტეფან დიუჟარიკმა ნიუ-იორკში, გაეროს შტაბ-ბინაში გამართულ ყოველდღიურ პრესკონფერენციაზე ახლო აღმოსავლეთში მიმდინარე მოვლენებთან დაკავშირებით ინფორმაცია გააზიარა.

დიუჟარიკმა დედაქალაქ კიევსა და უკრაინის სხვა ქალაქებზე დრონებითა და რაკეტებით განხორციელებულ საჰაერო თავდასხმებთან დაკავშირებით განაცხადა: „ეს არის დასახლებულ პუნქტებზე თავდასხმების ესკალაციის შემაშფოთებელი ტენდენციის კიდევ ერთი ტრაგიკული მაგალითი“.

„გენერალური მდივანი მკაცრად გმობს რუსეთის ფედერაციის შეიარაღებული ძალების მიერ დედაქალაქ კიევსა და უკრაინის სხვა ქალაქების ცენტრებზე განხორციელებულ მასშტაბურ სარაკეტო და უპილოტო საფრენი აპარატებით იერიშს“, – განაცხადა დიუჟარიკმა და აღნიშნა, რომ ამ თავდასხმებმა ათეულობით მშვიდობიანი მოქალაქის დაღუპვა და დაშავება გამოიწვია, ასევე დიდი ზიანი მიაყენა მშვიდობიან მოსახლეობასა და სამოქალაქო ინფრასტრუქტურას.

„შემიძლია ვთქვა, რომ გენერალური მდივანი ღრმა შეშფოთებას გამოთქვამს ამ კონფლიქტის ესკალაციის გაგრძელების გამო, მათ შორის რუსეთის ფედერაციის ტერიტორიაზეც“, – განაცხადა დიუჟარიკმა.

დიუჟარიკმა ხაზი გაუსვა, რომ აღნიშნული თავდასხმები საერთაშორისო ჰუმანიტარული სამართლის აშკარა დარღვევაა და ისინი დაუყოვნებლივ უნდა შეწყდეს; მან ასევე გააჟღერა გუტერეშის მოწოდება „დაუყოვნებელი და უპირობო ცეცხლის შეწყვეტის“ შესახებ.

უკრაინის პრეზიდენტმა ვოლოდიმირ ზელენსკიმ გუშინ დილით გაკეთებულ განცხადებაში აღნიშნა, რომ დედაქალაქ კიევზე განხორციელებული თავდასხმის შედეგად 12 ადამიანი დაიღუპა და 40 დაშავდა.

კიევის მერმა ვიტალი კლიჩკომ კი განაცხადა, რომ რუსული არმიის თავდასხმების გამო კიევში 21 აგვისტო გლოვის დღედ გამოცხადდა.