პოლიციის წარმომადგენლებმა განაცხადეს, რომ პაკისტანის ჩრდილო-დასავლეთით პოლიციის განყოფილებაზე დანაღმული ავტომობილით განხორციელებული თავდასხმისა და შემდეგ შემთხვევის ადგილზე დამხმარე ძალად მისულ პოლიციელებზე თავდასხმის შედეგად, სულ მცირე 12 ოფიცერი დაიღუპა.
შაბათს მომხდარი თავდასხმის შემდეგ გადაღებულ კადრებში ჩანს, რომ შენობა ნანგრევებად იქცა, ირგვლივ კი აგურები, დამწვარი ნაშთები და განადგურებული ავტომობილებია მიმოფანტული.
პოლიციის მაღალჩინოსანმა საჯად ხანმა კვირას გაკეთებულ განცხადებაში აღნიშნა, რომ პოლიციის დანგრეული შენობიდან 12 პოლიციელის ცხედარი ამოიტანეს, სამი თანამშრომელი კი ცოცხალი გადაიყვანეს საავადმყოფოში.
პოლიციის ერთ-ერთმა წარმომადგენელმა, რომელმაც ვინაობის გამჟღავნება არ ისურვა, განაცხადა, რომ მილიტანები ჯერ ასაფეთქებელი ნივთიერებებით დანაღმული ავტომობილით შეიჭრნენ პოლიციის შენობაში, შემდეგ კი შიგნით შევიდნენ და გადარჩენილ ოფიცრებს ცეცხლი გაუხსნეს.
„პოლიციის დასახმარებლად სამართალდამცავი ორგანოების სხვა წარმომადგენლებიც გაიგზავნა, თუმცა ტერორისტებმა მათ ჩასაფრება მოუწყვეს, რამაც მსხვერპლი გამოიწვია“, - განაცხადა პოლიციის წარმომადგენელმა.
პოლიციის წყაროები აცხადებენ, რომ მილიტანებმა თავდასხმისას უპილოტო საფრენი აპარატებიც გამოიყენეს.
ყველაზე სასტიკი შეტაკება
შემთხვევის ადგილზე სამაშველო სამსახურებისა და სამოქალაქო საავადმყოფოების სასწრაფო დახმარების მანქანები მივიდნენ; ხელისუფლებამ ბანუს სახელმწიფო საავადმყოფოებში საგანგებო მდგომარეობა გამოაცხადა.
თავდასხმაზე პასუხისმგებლობა მილიტანთა ალიანსმა აიღო, რომელიც ცნობილია როგორც „ითიჰად ულ-მუჯაჰიდინი“.
მილიტანების თავდასხმებმა შესაძლოა კვლავ გაამწვავოს კონფლიქტი პაკისტანისა და ავღანეთის საზღვარზე. თებერვალში, მოკავშირეობიდან მტრობაზე გადასულ მხარეებს შორის ბოლო წლების ყველაზე მძიმე შეტაკებები დაიწყო; ისლამაბადმა განაცხადა, რომ ავღანეთის ტერიტორიაზე განხორციელებული საჰაერო იერიშების სამიზნე მილიტანების სიმაგრეები იყო.
მას შემდეგ შეტაკებები შემცირდა; საზღვრის გასწვრივ დროდადრო ხდებოდა შეხლა-შემოხლა, თუმცა ოფიციალური შეთანხმება ცეცხლის შეწყვეტის შესახებ არ გაფორმებულა.
ისლამაბადი ქაბულს იმ მილიტანების შეფარებაში ადანაშაულებს, რომლებიც ავღანეთის ტერიტორიას პაკისტანზე თავდასხმების დასაგეგმად იყენებენ.
თალიბანი ამ ბრალდებებს უარყოფს და აცხადებს, რომ პაკისტანში მილიტანების საქმიანობა შიდა პრობლემაა.
