ევროპარლამენტის მთავარმა მომლაპარაკებელმა ბერნდ ლანგემ ოთხშაბათს განაცხადა, რომ ევროპარლამენტისა და ევროკავშირის წევრი ქვეყნების მომლაპარაკებლები ევროკავშირსა და აშშ-ს შორის სავაჭრო შეთანხმებასთან დაკავშირებულ კანონმდებლობაზე შეთანხმების მიღწევასთან ახლოს არიან.
ევროკავშირის მთავრობებთან გამართული სამმხრივი მოლაპარაკებების მეორე რაუნდის შემდეგ ლანგემ აღნიშნა, რომ შეხვედრებზე განსაკუთრებით დაცვის მექანიზმებისა და შემოთავაზებული რეგულაციების გადახედვის პროცესთან დაკავშირებით „კარგი პროგრესი“ იქნა მიღწეული.
„ჩვენ ახლახან დავასრულეთ კონსტრუქციული სამმხრივი მოლაპარაკებების მეორე რაუნდი, სადაც დაცვის მექანიზმისა და ძირითადი რეგულაციის გადახედვისა და შეფასების საკითხებში კარგი პროგრესი გვაქვს, თუმცა წინ ჯერ კიდევ გარკვეული გზაა გასავლელი“, — განაცხადა ლანგემ.
ლანგემ ასევე დასძინა, რომ მომლაპარაკებლები გააგრძელებენ მუშაობას „სწრაფად და პასუხისმგებლობით“, რათა უზრუნველყონ თერნბერის შეთანხმების ერთგულება როგორც „სიტყვასიტყვით, ისე მისი სულისკვეთებით“, ევროკავშირის დემოკრატიული პროცედურებისა და საკანონმდებლო კალენდრის დაცვით.
მოლაპარაკებების შემდეგი რაუნდი 19 მაისს სტრასბურგში გაიმართება.
შემოთავაზებული კანონმდებლობა ეფუძნება ევროკავშირსა და აშშ-ს შორის თერნბერის სავაჭრო შეთანხმებას, რომელსაც ხელი მოეწერა 27 ივლისს შოტლანდიის ქალაქ თერნბერიში აშშ-ის პრეზიდენტ დონალდ ტრამპსა და ევროკომისიის პრეზიდენტ ურსულა ფონ დერ ლაიენს შორის.
აგვისტოში გამოქვეყნებულ ერთობლივ დეკლარაციაში დეტალურად გაწერილი შეთანხმება ფოკუსირებული იყო საბაჟო ტარიფების შემცირებასა და აშშ-სა და ევროკავშირს შორის უფრო ფართო სავაჭრო თანამშრომლობაზე.
ევროკომისიამ საბაჟო ტარიფების დებულებების იმპლემენტაციისთვის 28 აგვისტოს ორი საკანონმდებლო წინადადება წარადგინა. ერთ-ერთი წინადადება აშშ-ის გარკვეული საქონლისთვის ევროკავშირის ბაზარზე პრეფერენციულ წვდომას ითვალისწინებს, ხოლო მეორე აფართოებს ნულოვანი საბაჟო ტარიფის რეჟიმს ომარის გარკვეული პროდუქტების იმპორტზე.
ევროპარლამენტმა 23 მარტს დაამტკიცა საბჭოსთან მოლაპარაკებების წარმოების მანდატი.
