სირიამ განაცხადა, რომ აშშ-ის შუამავლობით, „დაძაბულობის შესამცირებლად“, ისრაელთან მაღალი დონის შეხვედრა გაიმართა.
სირიის საგარეო საქმეთა სამინისტროს წყაროებზე დაყრდნობით, ოფიციალურ საინფორმაციო სააგენტო SANA-ს ცნობით, საგარეო საქმეთა მინისტრ ასად ჰასან შეიბანის ხელმძღვანელობით მაღალი დონის დელეგაცია და ისრაელის დელეგაცია ერთმანეთს იორდანიაში შეხვდნენ.
შეხვედრა ისრაელის ბოლო საჰაერო თავდასხმის შემდეგ სირიის ტერიტორიაზე დაძაბულობის ესკალაციის შესამცირებლად და სირიასა და რეგიონში სტაბილურობის მხარდასაჭერად გაიმართა.
შეხვედრაზე, რომელსაც სირიის გენერალური და სამხედრო დაზვერვის ხელმძღვანელებიც ესწრებოდნენ, განიხილეს ისრაელის დარტყმების, დაკავების ოპერაციებისა და სამიზნე თავდასხმების შესაჩერებლად პრაქტიკული მექანიზმების შექმნა.
შეხვედრის შემდეგ გაკეთებულ განცხადებაში აღინიშნა, რომ მოლაპარაკებების პროცესის გააქტიურებით მიზნად ისახება უსაფრთხოების ისეთი შეთანხმების მიღწევა, რომელიც მომავალში უფრო ყოვლისმომცველი შეთანხმების საფუძველს შექმნის.
განცხადების თანახმად, შეხვედრაზე დადასტურდა სირიის, როგორც სუვერენული სახელმწიფოს სრული უფლება — ეროვნული ინტერესების შესაბამისად აღადგინოს და განავითაროს საკუთარი ეროვნული არმია, ასევე განსაზღვროს ალიანსები და პარტნიორობა; ამასთან, აღინიშნა, რომ სირია არ მიიღებს რაიმე ისეთ შეთანხმებას თუ მექანიზმს, რომელიც ამ სუვერენულ უფლებებს შეზღუდავს.
გავრცელებული ინფორმაციით, შეხვედრაზე კიდევ ერთხელ დადასტურდა სირიის პოზიცია, რომ ოკუპირებული გოლანი სირიის ტერიტორიაა, თუმცა აღინიშნა, რომ გოლანის საბოლოო სტატუსის განხილვა ჯერ კიდევ ნაადრევია; უშუალო პრიორიტეტად კი ისრაელის ძალების 2024 წლის 8 დეკემბრამდე (ძველი რეჟიმის დამხობამდე) არსებულ ხაზებზე დაბრუნება, 1974 წლის ძალების დაშორიშორების შესახებ შეთანხმების ხელახლა ამოქმედება და მისი სრულად შესრულება დასახელდა.
