ვუჩიჩმა სერბულ სატელევიზიო გადაცემაში მონაწილეობისას მიმდინარე მოვლენებსა და 25 ოქტომბერს დაგეგმილ ვადამდელ საყოველთაო არჩევნებთან დაკავშირებით გააკეთა განცხადება.
ვუჩიჩმა აღნიშნა, რომ პრეზიდენტის თანამდებობიდან 27 სექტემბერს გადადგება, იმავე საღამოს კი ხალხს მიმართავს და მადლობას გადაუხდის მხარდამჭერებს.
ვუჩიჩმა, რომელიც სერბეთში მრავალპარტიულ სისტემაზე გადასვლის შემდეგ ყველაზე ხანგრძლივად მყოფი პრეზიდენტია, განაცხადა: „ამას ქვეყნის მოქალაქეების გარეშე ვერ შევძლებდი. ერთადერთი, რისი თქმაც შემიძლია, არის ის, რომ სერბეთს და ამ ქვეყნის მოქალაქეებს ერთგულებით, შრომისმოყვარეობითა და თავდადებით ვემსახურე“.
მან აღნიშნა, რომ გადადგომის შემდეგ, 25 ოქტომბრის ვადამდელ საყოველთაო არჩევნების კამპანიაში რიგითი მოქალაქის სტატუსით მიიღებს მონაწილეობას და დასძინა:
„პატარა სატვირთო ავტომობილიც კი ვიყიდე, საკუთარი მანქანა მყავს. კარაუნიც (სახლი-ბორბლებზე) შევიძინე, რადგან ყველგან ვერ დავიძინებ. ყველაზე შორეულ სოფლებში ჩავალ და თუ გვიანობამდე მომიწევს დარჩენა, იქ ვიქნები. უამრავი სოფელია. ათასობით სოფელი არსებობს, სადაც ჯერ არ ვყოფილვარ. ქალაქებშიც მინდა ჩასვლა“.
ვუჩიჩმა აღნიშნა, რომ სერბეთის პროგრესული პარტია (SNS) საარჩევნო კამპანიის ფარგლებში, დედაქალაქ ბელგრადის ჩათვლით, დიდ ქალაქებში მიტინგებს გამართავს და დასძინა, რომ სჯერა, SNS-ი ხმების 50%-ზე მეტის მიღებას იმსახურებს.
