ჩინეთის სახელმწიფო მედიის ცნობით, ქვეყნის ცენტრალურ ნაწილში მდებარე ფეიერვერკების ქარხანაში მომხდარი აფეთქების შედეგად სულ მცირე 21 ადამიანი დაიღუპა, 61 კი დაშავდა.
ჩინეთის სახელმწიფო საინფორმაციო სააგენტო „სინხუამ“ (Xinhua) სამშაბათს გაავრცელა ინფორმაცია, რომ აფეთქება ორშაბათს ნაშუადღევს, ხუნანის პროვინციის ქალაქ ჩანშაში მდებარე ფეიერვერკების ქარხანაში მოხდა.
შემთხვევის ადგილზე დაახლოებით 500 მაშველი გაიგზავნა, საფრთხის ქვეშ მყოფი ზონებიდან კი მოსახლეობის ევაკუაცია განხორციელდა. ხელისუფლება აფეთქების გამომწვევ მიზეზებს იძიებს.
„სინხუას“ ცნობით, პრეზიდენტმა სი ძინპინმა გასცა განკარგულება, რომ მაქსიმალური ძალისხმევა მიემართოს დაკარგულთა ძებნისა და დაშავებულთა გადასარჩენად, ასევე მოითხოვა მომხდარის გამოძიება და სათანადო ზომების გატარება.
ჩინეთში სამრეწველო ავარიები, მათ შორის ფეიერვერკების ინდუსტრიაში, ხშირად ხდება.
გასულ წელს ხუნანში მდებარე სხვა ქარხანაში მომხდარ აფეთქებას ცხრა ადამიანი ემსხვერპლა; 2023 წელს ქვეყნის ჩრდილოეთით მდებარე ქალაქ ტიანძინში აფეთქებები საცხოვრებელ კორპუსებს გადაედო, რის შედეგადაც სამი ადამიანი დაიღუპა. თებერვალში კი ხუბეისა და ძიანსუს პროვინციებში მდებარე ფეიერვერკების მაღაზიებში მომხდარი აფეთქებების შედეგად, შესაბამისად, 12 და 8 ადამიანი დაიღუპა.
