სომხეთში გუშინ გამართულ საპარლამენტო არჩევნებში პრემიერ-მინისტრ ნიკოლ ფაშინიანის ხელმძღვანელობით მმართველმა პარტიამ გაიმარჯვა. ცენტრალური საარჩევნო კომისიის მიერ ორშაბათს გამოქვეყნებული პირველადი ოფიციალური შედეგების მიხედვით, ფაშინიანის პარტიამ „სამოქალაქო შეთანხმება“ ხმების 49,8% მიიღო და არჩევნებში პირველი ადგილი დაიკავა.

პრორუსი სომეხი მილიარდერის, სამველ კარაპეტიანის ლიდერობით ალიანსი „ძლიერი სომხეთი“ 23,3%-ზე დარჩა. ყოფილი პრეზიდენტის, რობერტ ქოჩარიანის ალიანსმა „სომხეთი“ ხმების 9,9% მიიღო, ხოლო პარტიამ „აყვავებული სომხეთი“ — 4%, რითაც მათ პარლამენტში შესვლა მოახერხეს. გამოცხადდა, რომ არჩევნებზე აქტივობამ 59% შეადგინა.

შედეგების გამოცხადების შემდეგ ფაშინიანმა მიღებულ წარმატებას „ისტორიული გამარჯვება“ უწოდა, რომელიც „სომხეთის მარადიულობასა და განვითარებას უზრუნველყოფს“.

„დასავლეთთან დაახლოება გაგრძელდება, რუსეთთან კავშირები შენარჩუნდება“

საარჩევნო გამარჯვების შემდეგ ფაშინიანმა საგარეო პოლიტიკური გზავნილები გააჟღერა, სადაც დადო პირობა „დასავლეთთან დაახლოების კურსის გაგრძელების“ შესახებ და, ამავდროულად, ხაზგასმით აღნიშნა, რომ რუსეთთან ურთიერთობების განვითარებასაც გააგრძელებენ.

ევროკომისიის პრეზიდენტმა ურსულა ფონ დერ ლაიენმა სოციალური ქსელის მეშვეობით ფაშინიანს გამარჯვება მიულოცა. მან აღნიშნა: „მივესალმებით დემოკრატიულ სომხეთს, რომელიც დღითიდღე უფრო მეტად უახლოვდება ევროპას. სომხეთს შეუძლია ჩვენი იმედი ჰქონდეს“.

ოპოზიციის პრეტენზია „საეჭვო არჩევნების“ შესახებ

ფაშინიანის ყველაზე ძლიერმა მეტოქემ, სამველ კარაპეტიანმა, არჩევნებს „სამარცხვინო“ უწოდა. მან განაცხადა, რომ მისი საარჩევნო შტაბის ათობით წევრი დააკავეს და აღნიშნა, რომ კენჭისყრის პროცესში ადგილი ჰქონდა დარღვევებსა და ზეწოლას.

სომხეთის საგამოძიებო კომიტეტმა განაცხადა, რომ დარღვევების შესახებ ბრალდებებთან დაკავშირებით, მათ შორის განმეორებითი ხმის მიცემის ფაქტებზე, აღძრულია 59 სისხლის სამართლის საქმე და დაკავებულია 9 პირი.

დაძაბული ურთიერთობები მოსკოვთან

ნიკოლ ფაშინიანის მმართველობის პერიოდში სომხეთმა გაყინა ურთიერთობები რუსეთის ლიდერობით მოქმედ კოლექტიური უსაფრთხოების ხელშეკრულების ორგანიზაციასთან (კუხო), გააღრმავა კავშირები ევროკავშირთან და აშშ-სთან და გადადგა ნაბიჯები ევროკავშირში შესაძლო გაწევრიანებისკენ. მოსკოვის ადმინისტრაცია კი არ მალავს უკმაყოფილებას რეგიონში მისი გავლენის შესუსტების გამო.

რუსეთის პრეზიდენტმა პუტინმა მაისში გაკეთებულ განცხადებაში უკრაინის მაგალითი მოიყვანა და ერევნის ხელისუფლება ირიბად გააფრთხილა: „ყველა ვხედავთ, რა ხდება დღეს უკრაინაში. როგორ დაიწყო ეს ყველაფერი? უკრაინის ევროკავშირში გაწევრიანების მცდელობით“. არჩევნებამდე რამდენიმე კვირით ადრე რუსეთის მიერ სომხეთიდან გარკვეული პროდუქციის იმპორტის აკრძალვა ერევანზე ეკონომიკური ზეწოლის მცდელობად შეფასდა.