თურქეთის შინაგან საქმეთა მინისტრი მუსტაფა ჩიფთჩი, რომელიც თურქულ სახელმწიფოთა ორგანიზაციის (TDT) შინაგან საქმეთა მინისტრების მე-3 შეხვედრის ფარგლებში ყაზახეთში იმყოფება, დედაქალაქ ასტანის შემდეგ ქალაქ თურქესტანს ეწვია.
მინისტრმა ჩიფთჩიმ მოინახულა ხოჯა აჰმედ იასავის მავზოლეუმი და აჰმედ იასავის სახელობის უნივერსიტეტი, ასევე შეხვდა ყაზახეთის შინაგან საქმეთა მინისტრ ერჟან სადენოვს.
შეხვედრაზე მხარეებმა ორ ქვეყანას შორის სამართალდამცავი ორგანოების თანამშრომლობის გაღრმავების საკითხები განიხილეს. განსაკუთრებული ყურადღება გამახვილდა ტრანსსასაზღვრო და კიბერდანაშაულთან ბრძოლაზე, სამძებრო საქმიანობაზე, მიგრაციულ უსაფრთხოებაზე, კადრების მომზადებასა და შესაბამის სტრუქტურებს შორის პირდაპირ თანამშრომლობაზე.
მოლაპარაკებების დასრულების შემდეგ მინისტრებმა ხელი მოაწერეს ყაზახეთსა და თურქეთს შორის რეადმისიის შეთანხმებას.
მინისტრმა სადენოვმა თავის გამოსვლაში განაცხადა, რომ ყაზახეთსა და თურქეთს ძმური ურთიერთობები და მაღალი დონის ორმხრივი ნდობა აკავშირებს, რაც ორ ქვეყანას შორის უწყებრივ დონეზე კონკრეტულ თანამშრომლობაშიც აისახება.
მხარეები შეთანხმდნენ უწყებებს შორის პირდაპირი კომუნიკაციის განვითარებაზე, გამოცდილების გაზიარების გაზრდასა და უსაფრთხოების აქტუალურ საკითხებზე ერთობლივი მუშაობის გაძლიერებაზე. ამასთან, რეადმისიის შეთანხმების მიზანია ორ ქვეყანას შორის მიგრაციის სფეროში თანამშრომლობის სამართლებრივი ბაზის განმტკიცება და იმ პირთა დაბრუნების პროცედურების განსაზღვრა, რომლებსაც მხარეთა ტერიტორიაზე ყოფნის კანონიერი საფუძველი არ გააჩნიათ.
