სააგენტო „ანადოლუს“ ინფორმაციით, საფრანგეთის პრეზიდენტმა მაკრონმა გუშინ, სომხეთის დედაქალაქ ერევანში გამართული ევროპის პოლიტიკური გაერთიანების (AST) სამიტის წინ, მედიის წარმომადგენლებთან განცხადება გააკეთა.
მაკრონმა აღნიშნა, რომ ორ ქვეყანას შორის მიღწეული დროებითი ზავის შემდეგ აშშ-ის პრეზიდენტ დონალდ ტრამპსა და ირანის პრეზიდენტ მასუდ ფეზეშქიანთან გამართა შეხვედრები და დასძინა: „ცეცხლის შეწყვეტა უნდა მოიცავდეს ლიბანსა და ჰორმუზის სრუტის ხელახლა გახსნას“.
„ჩვენ არ მივიღებთ მონაწილეობას ძალის გამოყენებით განხორციელებულ არანაირ ოპერაციაში“
მაკრონმა მიუთითა, რომ 17 აპრილს პარიზში გაიმართა კონფერენცია ჰორმუზის სრუტეში ნავიგაციის თავისუფლების აღდგენის შესახებ და აღნიშნა: „იმავე დღეს აშშ-მა ჰორმუზის სრუტეში ბლოკადა გამოაცხადა“.
„თუ აშშ მზადაა ჰორმუზის სრუტის ხელახლა გასახსნელად, ეს ძალიან კარგია. ჩვენ ამას თავიდანვე ვითხოვდით, თუმცა არ მივიღებთ მონაწილეობას ძალის გამოყენებით განხორციელებულ არანაირ ოპერაციაში, რომლის ჩარჩოებიც, ჩემი აზრით, ბუნდოვანია“, — განაცხადა მაკრონმა და დასძინა, რომ სრუტის ხელახლა გახსნისთვის შექმნეს მისია, რომლის სამხედრო დაგეგმარებაც დიდი ბრიტანეთის დედაქალაქ ლონდონში განხორციელდა.
ჰორმუზის სრუტესთან დაკავშირებით მაკრონმა აღნიშნა: „ჩვენ გვსურს მისი ხელახლა გახსნა ირანსა და აშშ-ს შორის კოორდინირებული გზით. ეს ერთადერთი გამოსავალია ჰორმუზის სრუტის მუდმივად გახსნისა და ნავიგაციის თავისუფლების უზრუნველსაყოფად ყოველგვარი შეზღუდვებისა და შესვლის საფასურის გარეშე“.
მაკრონმა ხაზგასმით აღნიშნა, რომ ლიბანში ცეცხლის შეწყვეტის რეჟიმის დაცვა სასიცოცხლოდ მნიშვნელოვანია, მხარეებმა ამ კუთხით აიღეს ვალდებულებები და დაამატა: „წუხელ კვლავ ათობით ადამიანი დაიღუპა“.
მაკრონმა ყურადღება გაამახვილა იმაზე, რომ ევროპელები საკუთარი უსაფრთხოების გადაწყვეტილებებს თავად ქმნიან:
„ამის გაკეთება 2022 წელს ევროპის პოლიტიკური გაერთიანების შექმნით გადავწყვიტეთ. ეს გადავწყვიტეთ უკრაინისთვის უსაფრთხოების გარანტიების უზრუნველსაყოფად „მოხალისეთა კოალიციის“ შექმნით. სწორედ ეს იყო ის, რაც გავაკეთეთ ჰორმუზის გათავისუფლებისთვის ორგანიზებული სპეცოპერაციითა და მისიით“.
მაკრონმა განაცხადა, რომ ევროპელებმა „საკუთარი ბედი ხელში აიღეს“, გაზარდეს თავდაცვისა და უსაფრთხოების ხარჯები და მუშაობენ ერთობლივ გადაწყვეტილებებზე. მან ხაზი გაუსვა, რომ ისინი ამას ვინმეს საპასუხოდ არ აკეთებენ.
