აშშ-ის ცენტრალურმა სარდლობამ (CENTCOM) სამშაბათს საღამოს ირანზე განხორციელებული თავდასხმების დროს განსაკუთრებით ჰორმუზის სრუტის მიმდებარე ტერიტორია და ქვეყნის სამხრეთი რეგიონები ამოიღო მიზანში.

აშშ-ის მხრიდან ირანზე თავდასხმის მუქარის შემდეგ, გუშინ საღამოს ქვეყნის სამხრეთ ქალაქებიდან აფეთქებების ხმების შესახებ დაიწყო ცნობების გავრცელება. ამის შემდეგ CENTCOM-მა განაცხადა, რომ ირანის მასშტაბით იერიშები მიიტანა იმ სამიზნეებზე, რომლებიც, მისი მტკიცებით, „ისლამური რევოლუციის გუშაგთა კორპუსს“ ეკუთვნოდა.

ირანული მედიის ცნობით, აფეთქებების ხმები გაისმა ჰორმუზის სრუტეში მდებარე კუნძულ ყეშმზე, ქალაქ სირიკში, სტრატეგიულ საპორტო ქალაქ ბენდერ-აბასში, ასევე სამხრეთ სანაპიროზე მდებარე ასალუიეში, ჩაბაჰარსა და კონარაქში. გავრცელებული ინფორმაციით, თავდასხმების სამიზნე ქერმანის პროვინციაში მდებარე ჯიროფტის აეროპორტიც გახდა.

ჰორმოზგანის გუბერნატორის მოადგილემ, აჰმად ნეფისიმ განაცხადა, რომ აშშ-მა სირიკის ოლქში შემავალ ქალაქ ქუჰეშთექში საცხოვრებელ სახლს დაარტყა, სადაც საქორწილო ცერემონია იმართებოდა. ნეფისის განცხადებით, პირველადი მონაცემებით, თავდასხმას სულ მცირე 4 ადამიანი ემსხვერპლა, 68 კი დაშავდა. ხუზისტანის რეგიონში კი 7 ადამიანის დაღუპვისა და 8-ის დაშავების შესახებ იტყობინებიან.

ირანის „ისლამური რევოლუციის გუშაგთა კორპუსმა“ კი განაცხადა, რომ აშშ-ის კუთვნილი MQ-9 ტიპის უპილოტო საფრენი აპარატი (დრონი) ჩამოაგდო. განცხადებაში გაჟღერდა მუქარა, რომ აშშ-ის თავდასხმებმა „ჰორმუზის სრუტის საკეტი კიდევ უფრო მოუჭირა“.

ირანის გენერალური შტაბის მიერ გავრცელებულ განცხადებაში კი აღნიშნულია: „რაც უფრო მეტად დაიჟინებს აშშ-ის არმია რეგიონში აგრესიის გაგრძელებას, მით უფრო დიდ და მძიმე დანაკარგებს უნდა შეეგუოს“.

გვიან ღამით ირანულმა მედიამ გაავრცელა ინფორმაცია, რომ კუნძულ ყეშმსა და ქალაქ ბენდერ-აბასში ახალი აფეთქებების ხმები გაისმა. CENTCOM-მა კი ოთხშაბათს, გამთენიისას განაცხადა, რომ ირანში არსებულ სამიზნეებზე თავდასხმები დაასრულა.

ირანის არმიამ ასევე განაცხადა, რომ იორდანიაში, ბაჰრეინსა და ერაყში მდებარე აშშ-ის სამხედრო ბაზებზე სარაკეტო და დრონებით საპასუხო იერიშები მიიტანა.

რეგიონის ქვეყნებში განგაშის სირენები ჩაირთო, დაძაბულობა კვლავ გამწვავდა

მას შემდეგ, რაც ირანმა რეგიონში აშშ-ის ბაზებზე საპასუხო დარტყმების დაწყების შესახებ გამოაცხადა, სოციალურ ქსელებში გავრცელდა კადრები რეგიონის ქვეყნებიდან, სადაც ცაზე სინათლის ზოლები ჩანდა და აფეთქებების ხმები ისმოდა.

იორდანიის არმიამ განაცხადა, რომ ქვეყნის საჰაერო სივრცეში შემოსული 13 ბალისტიკური რაკეტიდან 10 გაანეიტრალეს, ხოლო 3 დაუსახლებელ ტერიტორიაზე ჩამოვარდა. ზოგიერთმა ავიაკომპანიამ იორდანიის მიმართულებით ფრენები გააუქმა.

ქუვეითმა მოსახლეობა ირანიდან დრონებითა და რაკეტებით განხორციელებული თავდასხმების შესახებ გააფრთხილა და განაცხადა, რომ ჰაერსაწინააღმდეგო თავდაცვის სისტემები ამოქმედდა.

ბაჰრეინმაც განაცხადა, რომ ჰაერსაწინააღმდეგო თავდაცვის სისტემებმა ირანიდან განხორციელებული დრონების თავდასხმები მოიგერია.

მეორე მხრივ, ისრაელის არმიამ განაცხადა, რომ ლიბანიდან გაშვებული უპილოტო საფრენი აპარატების გამო ქვეყნის ჩრდილოეთით მდებარე ზოგიერთ რაიონში განგაშის სირენები ამოქმედდა და ჰაერსაწინააღმდეგო რაკეტები გაუშვეს.