ისრაელის ულტრამემარჯვენე ეროვნული უსაფრთხოების მინისტრმა, იტამარ ბენ-გვირმა, პალესტინელი ქალი პატიმრების საკნებში რეიდი მოაწყო და მათ დასცინა სიტყვებით: „მე ვარ პასუხისმგებელი იმაზე, რომ ამ მდგომარეობაში ხართ და ამით კმაყოფილი ვარ“.

ბენ-გვირმა სოციალურ ქსელში გამოაქვეყნა კადრები, სადაც ასახულია ისრაელის ციხეში პალესტინელი ქალი პატიმრების საკნებში მისი შეჭრის მომენტები.

ვიდეოში ჩანს ერთ-ერთი პალესტინელი პატიმარი, რომელიც ამბობს, რომ ციხეში პირობები უკიდურესად მძიმეა და მათ ელემენტარული პირადი საჭიროებების დაკმაყოფილების საშუალებაც კი არ აქვთ: „სამი დღეა არ დაგვიბანია. ჩვენი ტანსაცმელი სუფთა არ არის, პირობები ძალიან ცუდია“.

ბენ-გვირი კი მათ დასცინის: „ციხეში თქვენი კარგი დღეები დასრულდა. ახლა ვითარება ასეთია. ამაზე მთავარი პასუხისმგებელი მე ვარ და ამით კმაყოფილი ვარ“.

პატიმარ ქალს, რომელიც პირობების გაუმჯობესებას ითხოვდა, ბენ-გვირმა უპასუხა: „მე რატომ უნდა დაგეხმაროთ?“

„აქ სასტუმრო არ არის“ - ასე დასცინა მან პატიმრებს

მას შემდეგ, რაც ბენ-გვირი ეროვნული უსაფრთხოების მინისტრის პოსტზე დაინიშნა, ისრაელის ციხეებში პალესტინელი პატიმრების უფლებების დარღვევის შემთხვევები მკვეთრად გაიზარდა.

ისრაელელი მინისტრი მანამდეც რამდენჯერმე ეწვია ციხეებს, სადაც პალესტინელი პატიმრები იმყოფებიან, შეურაცხყოფა მიაყენა მათ და ერთ-ერთ პატიმარ ქალს, რომელიც პირობების გაუმჯობესებას ითხოვდა, უთხრა: „აქ სასტუმრო არ არის“.

პალესტინური და საერთაშორისო უფლებადამცველი ორგანიზაციების მონაცემებით, ისრაელის ციხეებში 9 500-ზე მეტი პალესტინელი იმყოფება, მათ შორის 350 ბავშვი და 94 ქალია.

ათობით პალესტინელი გარდაიცვალა ისრაელის ციხეებში არსებული გაუსაძლისი პირობების გამო, რაც მოიცავს შიმშილს, წამებასა და სამედიცინო უგულებელყოფას.