უკრაინამ განაცხადა, რომ პარასკევს რუსეთმა შავ ზღვაში, სამხრეთ სანაპიროსთან, ორ სატვირთო გემს დაარტყა, რის შედეგადაც ერთ-ერთ გემზე ეკიპაჟის ერთი წევრი დაიღუპა.
რეკონსტრუქციის მინისტრმა, ოლექსი კულებამ Telegram-ში გავრცელებულ განცხადებაში აღნიშნა, რომ ერთ-ერთი გემი სამხრეთში მდებარე ჩორნომორსკის პორტში მარცვლეულის დასატვირთად მიემართებოდა, ხოლო მეორეს ოდესის პორტთან ახლოს დაარტყეს, როდესაც მას სოიო გადაჰქონდა.
„სამწუხაროდ, თავდასხმას ეკიპაჟის ერთ-ერთი წევრის, სირიის მოქალაქის სიცოცხლე ემსხვერპლა. ეს კიდევ ერთი მაგალითია იმისა, რომ რუსეთი განზრახ იღებს სამიზნეში სამოქალაქო ობიექტებს, საერთაშორისო საზღვაო გადაზიდვებსა და სურსათის ლოჯისტიკას“, - განაცხადა კულებამ.
გასულ თვეში უკრაინამ რუსეთი დაადანაშაულა ორ სატვირთო ბორანზე თავდასხმაში, რომელთაგან ერთს მზესუმზირის ზეთი გადაჰქონდა, მეორეს კი — ახალი ხილი, ბოსტნეული და სხვა საკვები პროდუქტები.
თურქეთის მოწოდებები თავშეკავებისკენ შავ ზღვაში
მას შემდეგ, რაც გასულ თვეში უკრაინამ განაცხადა, რომ რეგიონში რუსეთთან დაკავშირებულ ტანკერებს საზღვაო დრონები დაესხნენ თავს, თურქეთმა გამოსცა გაფრთხილება, რომ შავ ზღვაში „დაძაბულობა შემაშფოთებლად იზრდება“.
პრეზიდენტმა რეჯეფ თაიფ ერდოღანმა დეკემბერში თავის რუს კოლეგასთან, ვლადიმერ პუტინთან პირისპირ შეხვედრისას, რუსეთ-უკრაინის ომში პორტებსა და ენერგეტიკულ ობიექტებზე თავდასხმების საკითხზე „შეზღუდული ცეცხლის შეწყვეტისკენ” მოუწოდა.
