კატასტროფების რისკის მართვის ეროვნულმა ერთეულმა (UNGRD) ქვეყანაში მომხდარი 7,4 მაგნიტუდის სიმძლავრის მიწისძვრის შემდეგ არსებულ ბოლო ვითარებასთან დაკავშირებით განცხადება გაავრცელა.
განცხადების თანახმად, მიწისძვრის შედეგად დაღუპულთა რიცხვი 294-მდე გაიზარდა, დაშავებულთა რაოდენობა — 3 935-მდე, ხოლო დაკარგულთა რიცხვი 320-მდე ავიდა.
მიწისძვრამ 15 პროვინციის 448 დასახლება დააზარალა და გავრცელებული ინფორმაციით, სტიქიის შედეგად სულ 54 008 ოჯახი, ანუ 115 461 ადამიანი დაზარალდა.
ამასთანავე, მთავრობა აღდგენის გეგმას ამზადებს. გეგმა პრეზიდენტ აბელარდო დე ლა ესპრიელას მითითებების შესაბამისად მომზადდება. სამუშაოების ფარგლებში კოორდინაცია დამყარდება კატასტროფების რისკის მართვის ეროვნულ ერთეულს, საბინაო სამინისტროს, საწარმოებს, ადგილობრივ ხელისუფლებას, საჯარო და კერძო სექტორის ორგანიზაციებს, საფინანსო ინსტიტუტებსა და პარტნიორ ორგანიზაციებს შორის.
ქმედებებისა და რესურსების კოორდინაცია კი დაზარალებული რეგიონების აღსადგენად მთავრობის მიერ შექმნილი „სასწაულის ფონდის“ მეშვეობით განხორციელდება.
UNGRD-ის მონაცემებით, გუშინდელი მდგომარეობით, მიწისძვრის შემდეგ 256 განმეორებითი ბიძგი დაფიქსირდა; მათგან 17-ის მაგნიტუდა 3,0-ზე, ხოლო ორის — 4,0-ზე მეტი იყო.
გამოცხადებული იყო 3-დღიანი ეროვნული გლოვა
გავრცელდა ინფორმაცია, რომ ქვეყანაში 10 აგვისტოს მომხდარი 7,4 მაგნიტუდის სიმძლავრის მიწისძვრის შედეგად დაღუპულთა გამო 3-დღიანი „ეროვნული გლოვა“ გამოცხადდა.
პრეზიდენტმა დე ლა ესპრიელამ ქალაქ პერეირაში — სადაც მიწისძვრას ყველაზე მეტი მსხვერპლი მოჰყვა — გაკეთებულ განცხადებაში აღნიშნა, რომ ქვეყნის სხვადასხვა რეგიონში მომხდარი მიწისძვრის შედეგად უსახლკაროდ დარჩენილ ოჯახებს ქირის სუბსიდიით (დახმარებით) უზრუნველყოფენ.
