აშშ-ის პრეზიდენტმა დონალდ ტრამპმა განაცხადა, რომ ხელი მოაწერა ირანთან ურთიერთგაგების მემორანდუმს (MOU), რომელიც მიზნად ისახავს 28 თებერვლიდან მიმდინარე ომის დასრულებას.
საპრეზიდენტო კორტეჟში ჩაჯდომამდე, შეთანხმების შესახებ დასმულ კითხვაზე ტრამპმა ჟურნალისტებს განუცხადა: „ხელმოწერილია. ახლახან მოვაწერე ხელი ვერსალში“.
ტრამპის განცხადება მოჰყვა ირანის მხარის ინფორმაციას იმის შესახებ, რომ აშშ-სთან 14-პუნქტიანი ურთიერთგაგების მემორანდუმი ოფიციალურად გაფორმდა მას შემდეგ, რაც ორი ქვეყნის ლიდერებმა შეთანხმებას ხელი მოაწერეს.
ირანის ნახევრად ოფიციალური საინფორმაციო სააგენტო Mehr-ის ცნობით, ირანის საგარეო საქმეთა სამინისტროს სპიკერმა, ისმაილ ბეყაიმ, ხუთშაბათს დილით განაცხადა, რომ „ისლამაბადის მემორანდუმმა“ თეირანისა და ვაშინგტონის მიერ ხელმოწერის შემდეგ სრული ოფიციალური ძალა შეიძინა.
ბეყაიმ აღნიშნა, რომ შეთანხმება ციფრულად მოეწერება ხელს და დაადასტურა, რომ მემორანდუმის ფარგლებში მოლაპარაკებები ფოკუსირებული იქნება მხოლოდ ბირთვულ საკითხებსა და სანქციების შემსუბუქებაზე.
სპიკერის თქმით, მხარეები გამართავენ მოლაპარაკებებს, რომლებიც 60 დღემდე გაგრძელდება, ხოლო საკითხების სირთულიდან გამომდინარე, შესაძლოა მოლაპარაკებების ვადის გაგრძელებაც გახდეს საჭირო.
სპიკერმა ასევე აღნიშნა, რომ ისრაელის მიერ ბეირუთის სამხრეთ გარეუბნებზე თავდასხმების შემდეგ გამართული გადაუდებელი შეხვედრების კვალდაკვალ, აშშ-ის ვალდებულება საზღვაო ბლოკადის მოხსნის შესახებ ფაქტობრივად ძალაში შევიდა.
ბეყაიმ დასძინა, რომ ირანული გემები უკვე შეუფერხებლად შედიან და გამოდიან პორტებიდან, რაც იმის ნიშანია, რომ აშშ-ის მიერ აღებული ვალდებულებები უკვე მოქმედებს.
ბეყაიმ განაცხადა, რომ ჰორმუზის სრუტესთან დაკავშირებული ირანის ვალდებულებები მემორანდუმის ხელმოწერისა და იმპლემენტაციის შემდეგ ამოქმედდება.
ამერიკელმა მაღალჩინოსანმა სააგენტო „ანადოლუსთან“ დაადასტურა, რომ აღნიშნული მემორანდუმი ოთხშაბათს გაფორმდა.
ამერიკული საინფორმაციო პორტალ Axios-ის თანახმად, აშშ-ის პრეზიდენტმა დონალდ ტრამპმა შეთანხმების ერთ ასლს პირადად მოაწერა ხელი საფრანგეთის პრეზიდენტ ემანუელ მაკრონთან ვახშმობისას ვერსალის სასახლეში.
აღინიშნა, რომ ხელმოწერილი შეთანხმების ფოტო ირანულ მხარესა და შუამავალ ქვეყნებს უკვე გაეგზავნათ.
