აშშ-ის პირველმა ლედიმ, მელანია ტრამპმა, მოულოდნელი განცხადება გააკეთა, რომლითაც უარყო ბრალდებები იმის შესახებ, თითქოს მან იცოდა ეპშტეინის მხრიდან ძალადობის ფაქტების შესახებ ან თავად იყო მისი მსხვერპლი.
55 წლის მელანიას ხუთშაბათს კამერების წინ გამოჩენა მოულოდნელი იყო და წარმოადგენდა უჩვეულო ჩარევას სკანდალში, რომელიც დიდი ხანია აწუხებს მის მეუღლეს, პრეზიდენტ დონალდ ტრამპს.
„სიცრუე, რომელიც მე საზიზღარ ჯეფრი ეპშტეინთან მაკავშირებს, დღესვე უნდა დასრულდეს“, -განაცხადა მელანია ტრამპმა. „ადამიანებს, რომლებიც ჩემს შესახებ ცრუობენ, არ გააჩნიათ მორალური სტანდარტები, თავდაჭერილობა და პატივისცემა“.
ჯერჯერობით გაურკვეველია, რატომ გააკეთა სლოვენიაში დაბადებულმა ყოფილმა მოდელმა ეს საჯარო განცხადება; მას კონკრეტულ ბრალდებებთან დაკავშირებით დეტალებზე არ უსაუბრია.
მელანია და დონალდ ტრამპები ადრე დაფიქსირებულნი იყვნენ ეპშტეინთან ერთად გადაღებულ ფოტოებზე, თუმცა მელანიამ აღნიშნა, რომ მეუღლეს ეპშტეინის გაცნობამდე ორი წლით ადრე უკვე იცნობდა.
„მე არ ვარ ეპშტეინის მსხვერპლი. ეპშტეინს არ გავუცნივარ დონალდ ტრამპისთვის“, - თქვა მელანია ტრამპმა. მან ასევე დასძინა, რომ სოციალურ ქსელებში წლებია ვრცელდება „ყალბი გამოსახულებები და განცხადებები“: „დაუკვირდით, რისი გჯერათ: ეს სურათები და ისტორიები სრულიად სიცრუეა“.
პირველმა ლედიმ ასევე მოუწოდა კონგრესს, გამართოს საჯარო მოსმენები ეპშტეინის ძალადობისგან გადარჩენილი ადამიანებისთვის, რათა მათ მიეცეთ „ფიცის ქვეშ ჩვენების მიცემის შესაძლებლობა“.
ეპშტეინი 2019 წელს ფედერალური ზედამხედველობის ქვეშ გარდაცვლილი იპოვეს, სანამ ის სექს-ტრეფიკინგის ბრალდებით სასამართლოს მოელოდა, თუმცა სკანდალმა კვლავ გადაფარა ტრამპის მეორე საპრეზიდენტო ვადის დასაწყისი.
„ეპშტეინის ძალადობა“
აშშ-ის იუსტიციის დეპარტამენტმა გასულ წელს ეპშტეინთან დაკავშირებული უამრავი დოკუმენტი გამოაქვეყნა. 79 წლის ტრამპი ასევე უარყოფს რაიმე კავშირს ეპშტეინის დანაშაულებებთან. დოკუმენტებში ერთ-ერთ ფართოდ გავრცელებულ ფოტოზე დონალდ და მელანია ტრამპები ფლორიდაში, „მარ-ა-ლაგოს“ რეზიდენციაში, ეპშტეინთან და მის თანამზრახველ გისლენ მაქსველთან ერთად არიან ასახულნი.
„მე არასოდეს მქონია ინფორმაცია ეპშტეინის მხრიდან მსხვერპლთა მიმართ განხორციელებულ ძალადობაზე. არანაირი ფორმით არ ვყოფილვარ ამაში ჩართული. არასოდეს ვყოფილვარ ეპშტეინის თვითმფრინავში და არასოდეს ვწვევივარ მის კერძო კუნძულს“, - განაცხადა მელანია ტრამპმა. „არასოდეს ვყოფილვარ იურიდიულად ბრალდებული ან მსჯავრდებული ტრეფიკინგთან, არასრულწლოვანთა მიმართ ძალადობასთან ან სხვა საზიზღარ ქმედებებთან დაკავშირებით“.
სოციალურ ქსელებში სწრაფად გავრცელდა ვარაუდები იმის შესახებ, თუ რატომ დააბრუნა პირველმა ლედიმ ეპშტეინის სკანდალი დღის წესრიგში კვირების განმავლობაში დუმილის შემდეგ.
ეს განცხადება გაკეთდა მას შემდეგ, რაც მისმა მეუღლემ ირანის წინააღმდეგ აშშ-ისრაელის ომში ცეცხლის შეწყვეტა გამოაცხადა; კრიტიკოსები ამბობენ, რომ ამან სტრატეგიულად მნიშვნელოვან ჰორმუზის სრუტეზე თეირანის კონტროლი შეინარჩუნა.
თუმცა, მელანია ტრამპი თეთრ სახლში დიდი ხანია იდუმალ და რთულად მოსახელთებელ ფიგურად ითვლება; ის იშვიათად აკეთებს მსგავს საჯარო განცხადებებს. ბოლოს ის ორშაბათს, ასობით ბავშვის მონაწილეობით გამართულ სააღდგომო ღონისძიებაზე გამოჩნდა მეუღლესთან ერთად.
