ისრაელის მიერ საერთაშორისო წყლებში დაკავებული ჰუმანიტარული დახმარების ფლოტილიის, „გლობალური სუმუდის“ გემებზე მყოფი თურქეთის მოქალაქეები და სხვადასხვა ეროვნების სხვა აქტივისტები სტამბოლში ჩავიდნენ.
ჯგუფი სტამბოლში პარასკევ ღამეს სპეციალური რეისით ჩავიდა.
„თურქეთის ავიახაზების“ კუთვნილმა თვითმფრინავმა საბერძნეთის კუნძულ კრეტადან 59 ადამიანი ჩამოიყვანა, რომელთაგან 18 თურქეთის მოქალაქეა.
TK6934 რეისის თვითმფრინავი ადგილობრივი დროით 21:45 საათზე სტამბოლის აეროპორტში დაეშვა.
აქტივისტებს აეროპორტის VIP ტერმინალში ახლობლები და ოფიციალური პირები დახვდნენ.
დახვედრის შემდეგ მოსალოდნელია, რომ ჯგუფმა სტამბოლის სასამართლო სამედიცინო ექსპერტიზის ინსტიტუტში სამედიცინო შემოწმება გაიაროს სტამბოლის რესპუბლიკური პროკურატურის მიერ დაწყებული გამოძიების ფარგლებში.
ჯგუფი იყო საერთაშორისო ინიციატივის, „გლობალური სუმუდის ფლოტილიის“ ნაწილი, რომელიც მიზნად ისახავდა ისრაელის მიერ ღაზის ბლოკადის გარღვევას და ძირითადი ჰუმანიტარული დახმარების მიწოდებას.
ფლოტილიის 2026 წლის საგაზაფხულო მისია 12 აპრილს ბარსელონიდან დაიძრა და 26 აპრილს გზის გაგრძელებამდე სიცილიის სანაპიროსთან კვლავ შეიკრიბა.
ორგანიზატორების ინფორმაციით, ისრაელის ძალებმა გემები 29 აპრილის ღამეს კრეტას სანაპიროსთან, ღაზიდან დაახლოებით 600 საზღვაო მილის დაშორებით, საერთაშორისო წყლებში, საბერძნეთის ტერიტორიული წყლების უშუალო სიახლოვეს შეაჩერეს.
აქტივისტები დააკავეს, ოპერაციის დროს კი ნავები დაზიანდა.
ფლოტილიის ორგანიზატორებმა განაცხადეს, რომ მისიაში 39 ქვეყნიდან 345 მონაწილე იყო ჩართული, მათ შორის თურქეთის მოქალაქეებიც.
