Apple-მა შეტყობინებების აპლიკაცია Telegram-ი App Store-იდან მცირე ხნით ამოიღო ბავშვთა მიმართ სექსუალური ძალადობის შემცველი კონტენტის შესახებ წესების დარღვევის მიზეზით.
Telegram-ი ორშაბათს, ღამის საათებში, iPhone-ისა და iPad-ის აპლიკაციების მაღაზიებიდან გაქრა.
Apple-ის მიერ აშშ-ის ზოგიერთი მედიასაშუალებისთვის გაკეთებულ განცხადებაში ნათქვამია, რომ შემოწმების შედეგად Telegram-ში აღმოჩნდა კონტენტი, რომელიც არღვევს კომპანიის წესებს ბავშვთა მიმართ სექსუალური ძალადობის მასალების აკრძალვის შესახებ.
განცხადების თანახმად, მას შემდეგ, რაც Telegram-მა აღნიშნული კონტენტი სწრაფად წაშალა და მისი გამავრცელებელი მომხმარებელი დაბლოკა, აპლიკაცია კვლავ დააბრუნეს App Store-ში.
ამ მოვლენასთან დაკავშირებით, კომპანია X-ის პლატფორმაზე Telegram-მა გამოაქვეყნა პოსტი ფრაზით: „ცნობები ჩემი გარდაცვალების შესახებ ძალზედ გადაჭარბებულია“.
სხვა პოსტში კი, სადაც Telegram-მა Apple-ი მონიშნა, დასვა კითხვა: „დარწმუნებული ვარ, რომ ეს მიდგომა მომავალში მაღაზიაში არსებულ ყველა სხვა აპლიკაციაზეც თანაბრად გავრცელდება, არა?“
ცნობისთვის, რუსეთმა Telegram-ის დამფუძნებელი და აღმასრულებელი დირექტორი (CEO) პაველ დუროვი 30 ივნისს ტერორისტებისა და ექსტრემისტების სიაში შეიყვანა. ასევე, ავსტრალიის ინტერნეტ უსაფრთხოების კომისრის ოფისმა სასამართლოში უჩივლა Telegram-ს იმის გამო, რომ პლატფორმიდან არ აიღო ტერორიზმთან დაკავშირებული კონტენტი.
