ზელენსკიმ ესტონეთის დედაქალაქ ტალინში, სადაც ის ვიზიტით იმყოფება, პრეზიდენტ ალარ კარისთან გამართულ ერთობლივ პრესკონფერენციაზე ისაუბრა.

რუსეთ-უკრაინის ომის დასრულების მიზნით მიმდინარე სამუშაოებთან დაკავშირებით, ზელენსკიმ აღნიშნა, რომ გუშინ ტელეფონით ესაუბრა აშშ-ის პრეზიდენტ დონალდ ტრამპის ახლო აღმოსავლეთის სპეციალურ წარმომადგენელს სტივ ვიტკოფსა და მის სიძეს, ჯარედ კუშნერს.

ზელენსკიმ განაცხადა, რომ საუბრისას მათ განიხილეს ომის დასასრულებლად საჭირო მოლაპარაკებები და აღნიშნა, რომ პროცესში ევროპაც ეფექტურად უნდა იყოს ჩართული.

„საჭიროა, რომ ევროპა ამ მოლაპარაკებებში რეალური და ძლიერი ხმით მონაწილეობდეს გადაწყვეტილების მიღების პროცესში. ამერიკა მზადაა დიპლომატიურ პროცესებში აქტიურად ჩაერთოს“, - განაცხადა მან.

ომში ცეცხლის შეწყვეტის უზრუნველსაყოფად რუსეთის, უკრაინის, აშშ-ისა და ევროპის ლიდერების დონეზე მოლაპარაკებების გამართვის აუცილებლობაზე საუბრისას, ზელენსკიმ აღნიშნა: „რატომ ევროპა? იმიტომ, რომ ჩვენ ევროპაში ვართ, ეს არის პასუხი. იმიტომ, რომ ეს ჩვენი მიწაა, ეს ჩვენი კონტინენტია, ნებისმიერ შემთხვევაში უნდა ვიყოთ დარწმუნებულნი, რომ ხვალ უსაფრთხო ცხოვრება გვექნება“.

ზელენსკიმ ყურადღება გაამახვილა იმაზე, რომ საფრანგეთში გასამართი G7-ის სამიტი და თურქეთის მიერ მასპინძლობის ნატოს სამიტი უკრაინისთვისაც მნიშვნელოვანი იქნება და დასძინა: „ამ წლის ივნისსა და ივლისს ბევრი რამის განსაზღვრა შეუძლია“.