„როსატომის“ გენერალურმა დირექტორმა, ალექსეი ლიხაჩოვმა, განცხადებაში საკონტეინერო გემ „იანინაზე“ განხორციელებული თავდასხმის დეტალებზე ისაუბრა.
ლიხაჩოვმა აღნიშნა, რომ შავ ზღვაში გემზე თავდასხმა ორი უპილოტო საფრენი აპარატით განხორციელდა: „გემს საერთაშორისო წყლებში სამოქალაქო პროდუქცია გადაჰქონდა, მათ შორის გაყინული საკვები, სამშენებლო და სარემონტო მასალები. ამ თავდასხმის მეკობრეობისა და საზღვაო ყაჩაღობის გარდა სხვაგვარად ინტერპრეტირება შეუძლებელია“.
ლიხაჩოვმა განაცხადა, რომ ეკიპაჟის 17-ვე წევრი, რომლებმაც ჩაძირული გემი ორგანიზებულად დატოვეს, გადარჩენილია და მათ ჯანმრთელობის მდგომარეობას საფრთხე არ ემუქრება.
მან ასევე გაავრცელა ინფორმაცია, რომ ეკიპაჟის 16 წევრი ეგვიპტელი კაპიტნის მიერ მართულმა გემმა „Delphinus“-მა გადაარჩინა, ხოლო ბოლო წევრი ნაპირზე რუსეთის შავი ზღვის ფლოტის საზღვაო ავიაციის ჯგუფებმა გადაიყვანეს.
უკრაინის პრეზიდენტმა ვოლოდიმირ ზელენსკიმ მანამდე აღნიშნა, რომ რუსეთში სამ სხვადასხვა ნავთობგადამამუშავებელ ქარხანასა და რუსეთის დროშის ქვეშ მცურავ საკონტეინერო გემ „იანინაზე“ თავდასხმები განხორციელდა.
გემი „იანინა“, რომლის სიგრძე დაახლოებით 140 მეტრი, ხოლო სიგანე 22 მეტრია, 13 ათასი ტონა ტვირთამწეობის იყო.
რუსეთის ვლადივოსტოკის პორტში რეგისტრირებული გემი ინდოეთს, არაბთა გაერთიანებულ საამიროებსა და ნოვოროსიისკს შორის არსებულ ხაზზე ასრულებდა რეისებს.
