სუვეიდაში მიმდინარე სასტიკი ტომობრივი შეტაკებებისა და ისრაელის საჰაერო თავდასხმების შემდეგ 3500-ზე მეტმა ოჯახმა რეგიონი დატოვა. ევაკუაცია დაიწყო და მთავრობის მიერ წესრიგის აღდგენის მცდელობების ფონზე მყიფე ცეცხლის შეწყვეტის რეჟიმი ნარჩუნდება.
სირიის მთავრობამ სამხრეთ სუვეიდას პროვინციაში უსაფრთხოების კუთხით შექმნილი არეულობის შემდეგ ჩარჩენილი ოჯახების ევაკუაციისთვის რეგიონში ავტობუსები გაგზავნა.
სახელმწიფო საინფორმაციო სააგენტო SANA-მ სამშაბათს განაცხადა, რომ სუვეიდაში მრავალი საევაკუაციო ავტობუსი ჩავიდა და მშვიდობიანი მოსახლეობის უსაფრთხო ზონებში გადასაყვანად დაიძრა. სააგენტომ კოლონების რეგიონში გადაადგილების ამსახველი კადრებიც გაავრცელა.
ეს ნაბიჯი გადაიდგა იმ ფონზე, როდესაც ათასობით ადამიანი მზარდი ძალადობის გამო სუვეიდადან გარბის.
ოჯახები დარაში აფარებენ თავს
მეზობელ დარას პროვინციაში ადგილობრივმა ოფიციალურმა პირმა ორშაბათს სააგენტო „ანადოლუსთან“ (AA) საუბარში განაცხადა, რომ სუვეიდადან მიგრაციის ტალღა შეუჩერებლად გრძელდება.
ადგილობრივი ხელისუფლების შეფასებით, ბოლო დღეებში როგორც ბედუინების, ისე დრუზების თემებიდან 3500-ზე მეტმა ოჯახმა დარას შეაფარა თავი.
სუვეიდაში 13 ივლისს ბედუინ არაბულ ტომებსა და შეიარაღებულ დრუზულ დაჯგუფებებს შორის შეტაკებები დაიწყო, რამაც პროვინცია ქაოსში ჩააგდო.
ძალადობის ესკალაციის შემდეგ ისრაელმა საჰაერო თავდასხმები განახორციელა სირიის არმიის სამხედრო პუნქტებსა და ინფრასტრუქტურაზე, მათ შორის დედაქალაქ დამასკოში.
დრუზმა ლიდერებმა ისრაელის თავდასხმები დაგმეს
მიუხედავად იმისა, რომ ისრაელი აცხადებდა, რომ მის მიერ განხორციელებული საჰაერო თავდასხმები დრუზული მოსახლეობის „დაცვას“ ისახავდა მიზნად, სირიაში დრუზების ლიდერების უმეტესობამ ღიად დაგმო უცხოური ჩარევა და კვლავ დაადასტურა ერთიანი სირიის სახელმწიფოსადმი მხარდაჭერა.
შაბათიდან მოქმედი მყიფე ცეცხლის შეწყვეტის რეჟიმი პირველადი ჰუმანიტარული დახმარების ჩასვლისა და წესრიგის აღდგენის შესაძლებლობას იძლევა.
2024 წლის დეკემბერში ყოფილი რეჟიმის ლიდერის, ბაშარ ალ-ასადის გადაყენების შემდეგ შექმნილმა სირიის გარდამავალმა მთავრობამ პირობა დადო, რომ მთელი ქვეყნის მასშტაბით სტაბილურობას აღადგენს. სუვეიდა ამ მიზნის მისაღწევად მთავრობის წინაშე მდგარ ერთ-ერთ პირველ დიდ გამოწვევად ითვლება.
