ისრაელის პოლიციამ იერუსალიმის ლათინთა პატრიარქს, კარდინალ პიერბატისტა პიცაბალას, მაცხოვრის საფლავის ტაძარში შესვლასა და ბზობის დღესასწაულის ლიტურგიის აღვლენაში ხელი შეუშალა.
ეს ფაქტი მოჰყვა ოკუპირებულ აღმოსავლეთ იერუსალიმში მდებარე ალ-აქსას მეჩეთში მუსლიმებისთვის რამაზან-ბაირამის ლოცვაზე დასწრების აკრძალვას; მუსლიმებმა საუკუნეების განმავლობაში პირველად ვერ შეძლეს ამ წმინდა ადგილზე სადღესასწაულო ლოცვის აღვლენა.
ისრაელის ხელისუფლება ზედიზედ მეოთხე კვირაა კრძალავს მუსლიმთა დასწრებას პარასკევის ლოცვაზე ალ-აქსას მეჩეთში, რომელიც ისლამში მესამე უწმინდესი ადგილია; თებერვლის ბოლოდან მათ ტერიტორია დაკეტილი აქვთ უსაფრთხოების საბაბით, რაც, მათი მტკიცებით, ირანთან მიმდინარე ომს უკავშირდება.
ისრაელის ეს უკანონო ქმედებები აჩვენებს, რომ თავდასხმის ობიექტი არა მხოლოდ მუსლიმთა, არამედ ქრისტიანთა რელიგიური თავისუფლებაცაა.
იერუსალიმის ლათინთა საპატრიარქომ განაცხადა, რომ პიცაბალა წმინდა მიწის კუსტოდოსთან, მამა ფრანჩესკო იელპოსთან ერთად ტაძრისკენ მიმავალ გზაზე შეაჩერეს და „უკან დაბრუნება აიძულეს“.
საპატრიარქოს განცხადებით, ეს ფაქტი ნიშნავს, რომ საუკუნეების განმავლობაში პირველად მოხდა მაცხოვრის საფლავის ტაძარში — ქრისტიანებისთვის ერთ-ერთ ყველაზე წმინდა ადგილას — ეკლესიის წინამძღოლებისთვის ბზობის დღესასწაულის აღნიშვნის აღკვეთა.
მომხდარი შეფასდა, როგორც „მძიმე პრეცედენტი“, რომელიც „უგულებელყოფს“ მთელ მსოფლიოში მილიარდობით ქრისტიანის გრძნობებს, განსაკუთრებით ვნების კვირის განმავლობაში, როდესაც ყურადღება ოკუპირებულ აღმოსავლეთ იერუსალიმზეა გამახვილებული.
განცხადებაში ასევე აღნიშნულია, რომ ეკლესიის ლიდერები ირანთან ომის დაწყების შემდეგ ისრაელის მიერ დაწესებულ ყველა შეზღუდვას ემორჩილებოდნენ; მათ გააუქმეს საჯარო შეკრებები და უზრუნველყვეს ღვთისმსახურების ტრანსლაცია მთელი მსოფლიოს მასშტაბით.
ხაზგასმით აღინიშნა, რომ ეკლესიის მაღალი იერარქების შესვლის აკრძალვა წარმოადგენს „აშკარად დაუსაბუთებელ და უკიდურესად არაპროპორციულ ზომას“. გაკეთდა გაფრთხილება, რომ ეს გადაწყვეტილება არის გადახვევა აღმსარებლობის თავისუფლების პრინციპებიდან და წმინდა ადგილების მართვის დიდი ხნის წინ დამკვიდრებული სტატუს-კვოს პატივისცემიდან.
საპატრიარქომ „ღრმა მწუხარება“ გამოუცხადა იერუსალიმელ და მთელი მსოფლიოს ქრისტიანებს, ქრისტიანულ კალენდარში ერთ-ერთ ყველაზე წმინდა დღეს ღვთისმსახურების შეფერხების გამო.
