ხელისუფლებამ განაცხადა, რომ კიევი მასშტაბური ბალისტიკური სარაკეტო თავდასხმის ქვეშ მოექცა და თავდასხმების შედეგად სულ მცირე ხუთი ადამიანი დაშავდა.
უკრაინის დედაქალაქში ძლიერი აფეთქებების ხმები ისმოდა, სამთავრობო კვარტალთან ახლოს მდებარე საცხოვრებელი კორპუსი კი შეზანზარდა. ქალაქის ცენტრში მდებარე ერთ-ერთ მეტროსადგურს ათობით ადამიანმა შეაფარა თავი.
კიევის საქალაქო სამხედრო ადმინისტრაციის ხელმძღვანელმა, ტიმურ ტკაჩენკომ Telegram-ით გავრცელებულ განცხადებაში აღნიშნა: „დედაქალაქი ინტენსიური ბალისტიკური სარაკეტო თავდასხმის ქვეშ მოექცა“.
მერმა ვიტალი კლიჩკომ კი განაცხადა, რომ დაშავდა ხუთი ადამიანი, რომელთაგან ერთი ჰოსპიტალიზებულია. მან ასევე აღნიშნა, რომ შევჩენკოს, დნიპროსა და პოდილის რაიონებში ხანძრები გაჩნდა და საცხოვრებელი შენობები დაზიანდა.
უკრაინის ხელისუფლება და აშშ-ის საელჩო კიევში ადრეც აფრთხილებდნენ დედაქალაქზე მასშტაბური თავდასხმის შესაძლებლობის შესახებ მას შემდეგ, რაც რუსეთმა განაცხადა, რომ „დასჯიდა“ მათ, ვინც პასუხისმგებელი იყო რუსეთის მიერ კონტროლირებად აღმოსავლეთ უკრაინაში განხორციელებულ თავდასხმებზე.
შაბათს, როგორც უკრაინის პრეზიდენტმა ვოლოდიმირ ზელენსკიმ, ისე აშშ-ის საელჩომ კიევში, რუსეთის მხრიდან მასშტაბური საჰაერო თავდასხმის რისკის შესახებ გააფრთხილეს მოსახლეობა.
ზელენსკიმ თავის გაფრთხილებაში აღნიშნა: „ვხედავთ უკრაინის ტერიტორიაზე, მათ შორის კიევზე, კომბინირებული თავდასხმის მომზადების ნიშნებს სხვადასხვა სახის იარაღის, მათ შორის „ორეშნიკის“ გამოყენებით“. „ორეშნიკი“ ცნობილია როგორც რუსული ჰიპერბგერითი რაკეტა, რომელსაც ბირთვული ქობინების გადატანის შესაძლებლობა აქვს.
კიევი ამ თავდასხმას მას შემდეგ ელოდა, რაც მისმა ძალებმა რუსეთის მიერ კონტროლირებად აღმოსავლეთ ნაწილზე უპილოტო საფრენი აპარატებით თავდასხმა განახორციელეს. მოსკოვმა განაცხადა, რომ აღნიშნული თავდასხმა კოლეჯის საერთო საცხოვრებელზე მოხდა და სულ მცირე 18 ადამიანი დაიღუპა.
ხუთშაბათი ღამიდან პარასკევ დილამდე განხორციელებული უპილოტო საფრენი აპარატების თავდასხმა უკრაინის მხრიდან ბოლო თვეების ერთ-ერთი ყველაზე მომაკვდინებელი თავდასხმა გახდა, ოკუპირებული ლუგანსკის ოლქის ქალაქ სტარობილსკში კი 42 ადამიანი დაშავდა.
გავრცელებული ინფორმაციით, დაღუპულთა და დაკარგულთა უმეტესობა 2003-დან 2008 წლამდე დაბადებული ახალგაზრდა ქალები არიან.
უკრაინამ კი უარყო მშვიდობიანი მოსახლეობაზე თავდასხმა და განაცხადა, რომ დაარტყა რუსეთის უპილოტო საფრენი აპარატების ქვედანაყოფს, რომელიც ფრონტის ხაზიდან დაახლოებით 65 კილომეტრის დაშორებით, სტარობილსკის რეგიონში იყო დისლოცირებული.
